سپرکپ آف اسپین،بارسلونا کلب جدہ پہنچ گیا

بارسلونا کی ٹیم پیر کے روز سعودی عرب کے شہر جدہ پہنچی، جہاں لاپورتا نے ہوٹل میں قیام کے دوران سعودی شیوخ کو پھولوں کا تحفہ پیش کیا۔

سپرکپ آف اسپین اس سال بھی 7 سے 11 جنوری تک سعودی عرب میں کھیلی جا رہی ہے، جس کی میزبانی جدہ کر رہا ہے۔ بارسلونا کا وفد پیر کی دوپہر تقریباً ایک بجے بارسلونا ایئرپورٹ سے روانہ ہوا اور لگ بھگ پانچ گھنٹے کے سفر کے بعد کنگ عبدالعزیز انٹرنیشنل ایئرپورٹ پر اترا، جہاں سے ٹیم کو ہوٹل منتقل کیا گیا۔

صدر لاپورتا، جو 2025 میں دانی اولمو کی رجسٹریشن کے معاملے پر اپنے متنازع اشاروں اور بیانات کے باعث بھی خبروں میں رہے، جدہ میں بھی نمایاں دکھائی دیے۔ انہوں نے شائقین کے ساتھ تصاویر بنوائیں اور حسبِ روایت خود کو بارسلونا کے ماحول کا مرکزی کردار ثابت کیا۔

بارسلونا کے وفد میں صدر لاپورتا کے علاوہ کوچ ہانسی فلک، تمام طلب کردہ کھلاڑی، کوچنگ اسٹاف، نائب صدر اول رافائل یوستے، بورڈ آف ڈائریکٹرز کے اراکین شامل ہیں۔

بارسلونا منگل کی شام اپنا آفیشل ٹریننگ سیشن کرے گا، جبکہ اس سے قبل کوچ ہانسی فلک اور ایک کھلاڑی سیمی فائنل سے پہلے پریس کانفرنس کریں گے۔ بارسلونا بدھ کے روز مقامی وقت کے مطابق رات 8 بجے کنگ عبداللہ اسپورٹس سٹی اسٹیڈیم میں ایتھلیٹک کلب کے خلاف سیمی فائنل کھیلے گا۔

اگر بارسلونا کامیابی حاصل کرتا ہے تو فائنل اتوار کو رات 8 بجے کھیلا جائے گا، جبکہ دوسری سیمی فائنل میں اٹلیٹیکو میڈرڈ اور ریال میڈرڈ آمنے سامنے ہوں گے، جس کا فاتح فائنل میں بارسلونا یا ایتھلیٹک کلب سے مقابلہ کرے گا۔