سانچیز کا کرایہ نہ بڑھانے والے مالکان کے لیے ٹیکس میں رعایت کا اعلان
Screenshot
ہسپانوی وزیرِاعظم پیدرو سانچیز نے کرایہ داری کے بحران سے نمٹنے کے لیے ایک نئے اور سخت اقدامات کے پیکج کا اعلان کیا ہے، جس میں سب سے نمایاں اقدام یہ ہے کہ وہ مکان مالکان جو اپنے موجودہ کرایہ داروں کے ساتھ معاہدہ تجدید کرتے ہوئے کرایہ نہیں بڑھائیں گے، انہیں انکم ٹیکس (IRPF) میں سو فیصد رعایت دی جائے گی۔ یہ اقدامات آئندہ چند ہفتوں میں ایک شاہی فرمان (ریئل ڈکریٹو-لے) کے ذریعے نافذ کیے جائیں گے۔
پیر کے روز میڈرڈ میں کیمپامینتو کے سابق فوجی بیرکس کی مسماری کے آغاز کے موقع پر خطاب کرتے ہوئے سانچیز نے کہا کہ حکومت کرایہ داری کے شعبے میں “فوری اور فیصلہ کن” مداخلت کرے گی، تاکہ ملک بھر میں کرایہ پر رہنے والے تقریباً 30 لاکھ گھرانوں کو ریلیف دیا جا سکے۔ ان کے بقول: “جو لوگ باعزت رہائش کو یقینی بناتے ہیں ہم ان کی حمایت کریں گے، اور جو اس پر قیاس آرائی کرتے ہیں ہم ان کے لیے حد مقرر کریں گے۔”
حکومت کے مطابق، ٹیکس میں مکمل رعایت کا یہ اقدام کرایہ داری کی منڈی پر سب سے زیادہ اثر ڈال سکتا ہے۔ وزیرِاعظم نے وضاحت کی کہ اس سے تمام فریق فائدہ اٹھائیں گے: کرایہ دار بغیر اضافی بوجھ کے اپنے گھروں میں رہ سکیں گے، مالکان کو نئے کرایہ دار تلاش کرنے کی زحمت نہیں ہوگی اور ریاست سماجی بہبود کے لیے اپنے وسائل استعمال کرے گی۔ وزارتِ ہاؤسنگ کا کہنا ہے کہ اس رعایت کے ذریعے مالکان اس ممکنہ اضافے کی تلافی کر سکیں گے جو وہ کرایہ بڑھا کر حاصل کرتے، اس طرح ان کی آمدن متاثر نہیں ہوگی۔
نئے فرمان میں کمروں کے حساب سے کرائے پر دی جانے والی رہائش کو بھی ضابطے میں لایا جائے گا۔ حکومت کے مطابق، کسی مکان کے تمام کمروں سے وصول کیا جانے والا مجموعی کرایہ، پورے مکان کے کرائے سے زیادہ نہیں ہو سکے گا۔ اس کے علاوہ، جن علاقوں کو “دباؤ زدہ” قرار دیا گیا ہے، وہاں کمروں کے کرایوں پر بھی وہی کنٹرول لاگو ہوگا جو مکمل رہائشی معاہدوں پر نافذ ہے۔
اسی طرح موسمی کرایہ داری، خصوصاً 11 ماہ تک کے معاہدوں کے ذریعے قانون سے بچنے کے رجحان کو روکنے کے لیے سخت شرائط متعارف کرائی جائیں گی۔ اگرچہ ان کی تفصیل نہیں بتائی گئی، تاہم سانچیز نے واضح کیا کہ قلیل مدت کے کرایوں سے متعلق ریاستی قوانین کی خلاف ورزی پر سزاؤں کا نظام بھی قائم کیا جائے گا۔ ان کا کہنا تھا کہ شہروں میں ایسے معاہدے بڑھ رہے ہیں جو لوگوں کو مسلسل غیر یقینی کیفیت میں رکھتے ہیں، اور حکومت اس کی اجازت نہیں دے گی۔
یہ اعلان میڈرڈ میں کیمپامینتو کے علاقے میں ایک بڑے رہائشی منصوبے کے آغاز کے موقع پر کیا گیا۔ حکومت یہاں 211 ہیکٹر رقبے پر 10 ہزار 700 سستی رہائش گاہیں تعمیر کرے گی، جن میں کرایہ اور خرید، دونوں طرز کی رہائش شامل ہوگی، اور ان سب کی محفوظ حیثیت مستقل ہوگی۔ وزارتِ ہاؤسنگ کے مطابق، مقصد صرف عمارتیں کھڑی کرنا نہیں بلکہ ایسا محلہ بنانا ہے جو رہائش کے ساتھ ساتھ معیارِ زندگی کو بھی بہتر بنائے اور میڈرڈ میں رہائشی دباؤ کو کم کرے۔
About The Author
