وینزویلا میں سیاسی قیدیوں کی رہائی جاری رکھیں، زپاتیرور کی ثالثی قابل ستائش ہے،پیدرو سانچز

میڈرڈ/ اسپین کے وزیر اعظم پیدرو سانچیز نے کہا ہے کہ انہوں نے وینزویلا کی عبوری صدر دلسی روڈریگس سے بات کی اور سیاسی قیدیوں کی رہائی جاری رکھنے کی ضرورت پر زور دیا۔ سانچیز نے سابق صدر جوزے لوئس رودریگوس زپاتیرور کی ثالثی کے کام کو بھی سراہا، جسے نہ صرف وینزویلا کے موجودہ حکام بلکہ رہا ہونے والے قیدیوں نے بھی قابل تعریف قرار دیا ہے۔

سانچیز نے بتایا کہ انہوں نے دلسی روڈریگس کے ساتھ ساتھ وینزویلا کی اپوزیشن کے رہنما ایڈمونڈو گونزالیز، جو اسپین میں مقیم ہیں، سے بھی بات کی۔ انہوں نے کہا: “ہم عبوری صدر اور اپوزیشن کے ساتھ مل کر پرامن تبدیلی کے عمل میں شامل ہونے کے لیے تیار ہیں۔ اس عمل میں وینزویلا کی تمام سماجی قوتیں شامل ہونی چاہئیں تاکہ ملک میں جمہوریت اور شفاف انتخابات کو یقینی بنایا جا سکے۔ اصل فیصلہ وینزویلا کے عوام کا ہے اور ہم صرف معاونت فراہم کر سکتے ہیں۔”

سانچیز نے یہ گفتگو یونانی وزیر اعظم کریاکوس میتسوٹاکیس کے ساتھ ایک مشترکہ پریس کانفرنس کے دوران کی۔ انہوں نے سابق صدر زپاتیرور کے کردار کی تعریف کرتے ہوئے کہا: “میں ان کے کام کو تسلیم کرتا ہوں، خاص طور پر سیاسی قیدیوں کی رہائی کے حوالے سے۔ ان کا اور دیگر سیاسی و بین الاقوامی کرداروں کا تعاون دیکھ کر امید ہے کہ قیدیوں کی رہائی کا عمل جاری رہے گا۔”

گذشتہ ہفتے، امریکہ کی وینزویلا میں فوجی مداخلت کے بعد اسپین کی حکومت نے زپاتیرور کے کام سے کچھ فاصلے کا اعلان کیا تھا۔ وزیر خارجہ خوسے مانوئل البارس نے واضح کیا تھا کہ زپاتیرور حکومت کی نمائندگی میں کام نہیں کر رہے بلکہ یہ ثالثی ذاتی طور پر اپوزیشن کی درخواست پر کی جا رہی ہے۔