سپین: عوام چاہتے ہیں کہ سرکاری صحت کا نظام مضبوط بنایا جائے، چاہے ٹیکس بڑھانے پڑیں

میڈرڈ(دوست نیوز)اسپین میں عوامی رائے کے تازہ سروے کے مطابق 68 فیصد اسپینی شہریوں کا خیال ہے کہ صحت کا سرکاری نظام مضبوط ہونا چاہیے۔ یہ رائے تمام بڑے سیاسی جماعتوں کے حامیوں میں غالب ہے، لیکن بائیں بازو کے ووٹروں میں یہ حمایت سب سے زیادہ ہے: PSOE، Sumar اور Podemos کے 80 فیصد سے زائد ووٹرز صحت عامہ کو ترجیح دیتے ہیں۔ دائیں بازو میں یہ حمایت تھوڑی کم ہے، PP کے 60 فیصد اور Vox کے 54 فیصد ووٹرز نے سرکاری نظام کو مضبوط بنانے کی ترجیح دی۔

سروے کے مطابق زیادہ تر شہری صحت کے نظام میں بہتری چاہتے ہیں چاہے اس کے لیے ٹیکس میں اضافہ کرنا پڑے، البتہ گزشتہ تین برسوں میں عوامی رائے میں ٹیکس کم کرنے کے حق میں تھوڑا جھکاؤ پیدا ہوا ہے۔

صحت کے ماڈلز کی ترجیح کے حوالے سے سروے میں یہ نتائج سامنے آئے:

سرکاری صحت کو مضبوط کرنا: 68٪
مخلوط نظام (سرکاری و نجی دونوں): 27٪
نجی صحت کو زیادہ اہمیت دینا: 2٪

صحت کی نجی سہولتوں کے صارفین عام طور پر زیادہ مطمئن ہیں، جہاں 65.6 فیصد نے سروس کو اچھا یا بہت اچھا قرار دیا، جبکہ سرکاری نظام کی عمومی تعریف صرف 42.4 فیصد لوگوں نے کی۔ تقریباً نصف عوام کا خیال ہے کہ نجی شعبہ علاج کے مہنگے اور پیچیدہ معاملات میں محدود رہتا ہے اور اس کے لیے سرکاری نظام زیادہ تیار ہے۔

عوام کا ایک بڑا حصہ سمجھتا ہے کہ نجی شعبہ سرکاری نظام کا ضمیمہ بن سکتا ہے اور انتظار کے اوقات کو کم کرنے میں مدد دے سکتا ہے، لیکن یہ بھی کہ وہ صحت کو منافع پر ترجیح نہیں دیتا۔

علاقائی سطح پر بھی رجحانات مختلف ہیں۔ میڈرڈ کے شہری مخلوط نظام کو ترجیح دیتے ہیں جبکہ دیگر بڑے صوبے جیسے والنسیا، اندلس اور کاتالونیا میں سرکاری نظام کو مضبوط کرنے کی حمایت زیادہ ہے۔

اعتماد کے لحاظ سے عوام سب سے زیادہ ہسپتالوں اور ڈاکٹروں کے پیشہ ورانہ اداروں پر بھروسہ کرتے ہیں، جبکہ نجی انشورنس کمپنیوں اور حکومتوں کے بارے میں اعتماد نسبتا کم ہے۔

آنے والے وقت کے حوالے سے نوجوان، خاص طور پر جنریشن Z کے مرد، صحت کے نظام کے مستقبل کے بارے میں پرامید ہیں، جبکہ دیگر گروپوں کو نظام کے مزید خراب ہونے کا خدشہ ہے۔

اس سروے کے نتائج اس بات کی عکاسی کرتے ہیں کہ اسپین کی عوام صحت عامہ کو سب سے زیادہ ترجیح دیتی ہے، اور نجی شعبے کو بطور ضمیمہ قبول کرتی ہے، مگر بنیادی اعتماد اور توقعات سرکاری نظام کی مضبوطی پر مرکوز ہیں۔