بارسلونا میں میٹروکا سفر مہنگا، 2026 کے لیے پبلک ٹرانسپورٹ کے نئے کرائے جاری

بارسلونا(دوست نیوز)بارسلونا اور اس کے گرد و نواح میں سفر اب پہلے سے مہنگا ہو گیا ہے۔ اتھارٹی آف میٹروپولیٹن ٹرانسپورٹ (ATM) نے 2026 کے لیے پبلک ٹرانسپورٹ کے نئے نرخ نافذ کر دیے ہیں، جن میں اوسطاً 3.5 فیصد اضافہ کیا گیا ہے۔ یہ اضافہ توانائی اور آپریشنل اخراجات میں اضافے کو پورا کرنے کے لیے کیا گیا ہے۔

تاہم اس اضافے کا اثر تمام مسافروں پر یکساں نہیں پڑے گا۔ نیا کرایہ نامہ ایک واضح دو سطحی ماڈل کو مضبوط کرتا ہے۔

ایک طرف روزانہ سفر کرنے والے افراد ہیں، یعنی وہ لوگ جو کام یا تعلیم کے لیے میٹرو یا بس استعمال کرتے ہیں۔ یہ طبقہ بدستور سرکاری رعایتوں کے “سماجی تحفظ” کے تحت محفوظ رہے گا۔ دوسری طرف کبھی کبھار سفر کرنے والے مسافر اور سیاح ہیں، جنہیں مہنگائی کا پورا بوجھ اٹھانا پڑے گا۔ خاص طور پر T-Casual اور سنگل ٹکٹ کی قیمتیں ریکارڈ سطح تک پہنچ گئی ہیں۔

2026 کی سب سے نمایاں تبدیلی ماہانہ پاس اور دس سفروں والی ٹکٹ کے درمیان بڑھتا ہوا فرق ہے۔ انتظامیہ واضح پیغام دے رہی ہے کہ مستقل سفر کرنے والوں کے لیے سبسکرپشن زیادہ فائدہ مند ہے، جبکہ وقتی استعمال کی حوصلہ شکنی کی جا رہی ہے۔

سسٹم کی سب سے مقبول ٹکٹ T-Usual بدستور سب سے بہتر انتخاب ہے۔ حکومتِ کاتالونیا، کومونس اور مرکزی حکومت کے درمیان آخری لمحات میں ہونے والے معاہدے کے تحت 50 فیصد رعایت برقرار رکھی گئی ہے، جس کے بعد ایک زون کے لیے اس کی قیمت 22.80 یورو رہے گی۔ اگرچہ یہ 2025 کے مقابلے میں معمولی اضافہ ہے، مگر بغیر سبسڈی اس کی اصل قیمت 45 یورو سے زیادہ بنتی ہے، اس لیے یہ اب بھی انتہائی سستی سمجھی جا رہی ہے۔

اس کے برعکس T-Casual کو کسی اضافی سبسڈی کا سہارا حاصل نہیں۔ چنانچہ اس پر پورا اضافہ لاگو ہوا ہے۔ اب ایک زون کے لیے دس سفروں والی یہ ٹکٹ 13.00 یورو میں ملے گی، یعنی فی سفر لاگت 1.30 یورو۔ ایسے مسافر جو ہفتے میں تین یا چار دن سفر کرتے ہیں، ان کے لیے اب T-Usual زیادہ فائدہ مند بنتی جا رہی ہے، چاہے وہ اسے مکمل طور پر استعمال نہ بھی کریں۔

اہم نکتہ یہ ہے کہ 13 یورو کی نفسیاتی حد عبور کر کے T-Casual کو روزمرہ کے کام کے سفر کے لیے کم پرکشش بنانا مقصود ہے۔

اس نئی قیمتوں کی فہرست میں سب سے زیادہ فائدہ 30 سال سے کم عمر افراد کو ہوا ہے۔ T-Jove نے چھ میٹروپولیٹن زونز کے لیے ایک ہی فلیٹ ریٹ کا ماڈل برقرار رکھا ہے۔

50 فیصد رعایت کے بعد، تین ماہ کے لیے لامحدود سفر کی یہ ٹکٹ 45.50 یورو میں دستیاب ہو گی۔ اگرچہ یہ 2025 کے مقابلے میں 3.41 فیصد مہنگی ہے، مگر مسلسل استعمال کی صورت میں فی سفر سب سے سستی ٹکٹ یہی بنتی ہے۔

حساب لگایا جائے تو ایک مہینے کا لامحدود سفر تقریباً 15 یورو میں پڑتا ہے۔ مقصد یہ ہے کہ تعلیم یا پہلی ملازمت تک رسائی میں ٹرانسپورٹ کی قیمت رکاوٹ نہ بنے۔

سب سے زیادہ مہنگا ہونے والا ٹکٹ ایک بار کا سنگل ٹکٹ ہے، جس کی قیمت اب 2.90 یورو ہو گئی ہے۔ اس مہنگی قیمت کا مقصد مشینوں پر قطاریں کم کرنا اور بس ڈرائیوروں سے براہِ راست لین دین گھٹانا ہے، تاکہ سیاح اور کبھی کبھار سفر کرنے والے افراد روزانہ یا ڈیجیٹل پاسز کی طرف آئیں۔

نئی قیمتوں کے نفاذ کے ساتھ ہی پرانے اور نئے ٹکٹوں کا ایک عبوری دور بھی شروع ہو گیا ہے۔

• 28 فروری تک: 2025 میں خریدی گئی T-Casual یا T-Usual استعمال کی جا سکتی ہے۔
• 30 اپریل تک: طویل المدتی ٹکٹوں جیسے T-Jove اور T-70/90 کے لیے اضافی مہلت دی گئی ہے۔

یکم مارچ کے بعد، عام پرانے ٹکٹ ویلیڈیٹر مشینوں میں قابل قبول نہیں ہوں گے، اور صارفین کو ٹکٹ کاؤنٹر جا کر 2026 کی نئی قیمتوں کے مطابق ٹکٹ لینا ہو گی۔

About The Author