بلڈ ڈونرز میراتھن میں 10 ہزار سے زائد عطیات، مگر نوجوانوں کی شمولیت کم

بارسلونا(دوست نیوز)سال 2026 کی بلڈ ڈونرز میراتھن کے دوران 8 سے 17 جنوری کے درمیان خون، پلازما اور پلیٹ لیٹس کے مجموعی طور پر 10,236 عطیات جمع کیے گئے، یوں مقررہ ہدف 10 ہزار سے تجاوز کر لیا گیا۔ تاہم بینک دے سانگ ای تیخیتس کے مطابق نوجوان عطیہ دہندگان کی مطلوبہ تعداد سامنے نہ آ سکی۔

ادارے کے مطابق اس سال 10,185 افراد نے خون یا پلازما عطیہ کیا جبکہ 51 عطیات پلیٹ لیٹس کے تھے۔ یہ تعداد گزشتہ سال کے مقابلے میں قدرے کم ہے، جب مجموعی عطیات 10,343 تھے۔

علاقائی اعتبار سے خون اور پلازما کے عطیات میں بارسلونا سرفہرست رہا جہاں 6,222 عطیات ہوئے، اس کے بعد تاراگونا میں 2,220، جیرونا میں 1,091 اور للیئدا میں 652 عطیات ریکارڈ کیے گئے۔ کرسمس کی تعطیلات کے دوران خون کے ذخائر میں 20 فیصد سے زائد کمی دیکھی گئی۔

اعداد و شمار کے مطابق عطیہ دینے والوں میں سب سے بڑا گروپ 55 سے 65 سال کی عمر کے افراد پر مشتمل ہے، جو کل کا تقریباً 30 فیصد بنتا ہے۔ اس کے بعد 45 سے 55 سال کے عطیہ دہندگان آتے ہیں۔ مجموعی طور پر 45 سے 65 سال کے افراد آدھے سے زیادہ عطیہ دہندگان ہیں۔ بینک کا کہنا ہے کہ اصل چیلنج اوسط عمر کم کرنا اور نوجوانوں میں خون عطیہ کرنے کی عادت کو فروغ دینا ہے۔

ادارے نے یہ بھی بتایا کہ ہر سال تقریباً 35 ہزار افراد عطیہ دینا چھوڑ دیتے ہیں، یا تو عمر کی حد (70 سال) پوری ہونے کی وجہ سے یا کسی بیماری کے باعث۔ اسی لیے نئے عطیہ دہندگان کی اشد ضرورت ہے۔ میراتھن کے دوران 8.3 فیصد افراد نے پہلی بار خون عطیہ کیا، جو کہ سال کے دیگر حصوں میں اوسطاً 10 فیصد کے مقابلے میں کم ہے۔ ان نئے عطیہ دہندگان کی تعداد 844 رہی، جن میں سے 55 فیصد کی عمر 18 سے 34 سال کے درمیان ہے۔

اگرچہ ہدف حاصل کر لیا گیا، تاہم بینک دے سانگ ای تیخیتس نے زور دیا ہے کہ ان عطیات کا تسلسل بے حد ضروری ہے، کیونکہ مریضوں کی ضروریات پوری کرنے کے لیے روزانہ تقریباً 1,000 عطیات درکار ہوتے ہیں تاکہ کم از کم آٹھ دن کا ذخیرہ برقرار رکھا جا سکے۔

عمومی طور پر وہ تمام افراد خون عطیہ کر سکتے ہیں جو صحت مند ہوں، جن کی عمر 18 سے 70 سال کے درمیان ہو، وزن 50 کلو یا اس سے زیادہ ہو اور خواتین کی صورت میں وہ حاملہ نہ ہوں۔