اسپین،سرکاری اسکولوں اور اسپتالوں میں حلال مینو کی فراہمی کا حکومتی منصوبہ

میڈرڈ(دوست نیوز)اسپین کی حکومت نے فیصلہ کیا ہے کہ تمام سرکاری اسکولوں اور اسپتالوں میں حلال مینو دستیاب ہوگا۔ حکومت کے مطابق یہ اقدام سماجی ہم آہنگی اور باہمی احترام کو فروغ دینے کے لیے کیا جا رہا ہے اور اس سے صارفین پر کوئی اضافی مالی بوجھ نہیں پڑے گا۔

یہ تجویز وزارتِ سماجی حقوق نے عوامی مشاورت کے لیے پیش کی ہے۔ مجوزہ قانون کے تحت سرکاری اداروں کو خوراک کے معاملے میں اخلاقی، ثقافتی اور مذہبی تنوع کا خیال رکھنا ہوگا۔ اس میں ویگن، گلوٹن فری، لیکٹوز فری اور حلال مینو کی فراہمی شامل ہے۔

قانون میں صحت مند غذا کے فروغ پر بھی زور دیا گیا ہے، جس کے تحت پروسیسڈ اشیا میں کمی، اداروں کے اندر کھانا تیار کرنے اور بحیرۂ روم کی غذا کو اپنانے کی حوصلہ افزائی کی جائے گی۔

حکومت کے مطابق جیلوں میں اس طرز کے مینو پہلے ہی کامیابی سے نافذ کیے جا چکے ہیں، جہاں اخراجات قابو میں رہتے ہوئے صحت کے نتائج بہتر ہوئے ہیں۔ ماضی میں سیوتا اور میلیا کے اسکولوں میں حلال مینو کی فراہمی پر بھی اسی بنیاد پر وضاحت دی گئی تھی کہ وہاں زیادہ تر طلبہ مسلمان ہیں۔

حکومت کا کہنا ہے کہ اس پالیسی کا مقصد سب کے لیے یکساں، صحت مند اور قابلِ قبول خوراک کی فراہمی ہے۔