دلی خواہش تھی لودھراں میں آئی ٹی کا جدید ادارہ بناؤں، جہانگیر ترین

حکومتی اتحادی جماعت استحکام پاکستان پارٹی (آئی پی پی) کے رہنما جہانگیر ترین نے لودھراں میں انفارمیشن ٹیکنالوجی کا جدید ادارہ بنانے کی خواہش کا اظہار کردیا۔

جہانگیر ترین نے لودھراں میں آئی ٹی یونیورسٹی کا دورہ کیا اور آمنہ گرلز کالج کے تعمیراتی کام کا جائزہ لیا۔

آئی پی پی رہنما نے الیکشن 2024ء کی مہم کے دوران دونوں منصوبوں کا سنگ بنیاد رکھا تھا، دورے کے دوران جہانگیر ترین نے دونوں منصوبوں کو جلد مکمل کرنے کی ہدایت کی۔

جہانگیر ترین کو دی گئی بریفنگ میں بتایا گیا کہ دونوں منصوبے 15ماہ تک مکمل کر لیں گے۔

اس موقع پر جہانگیر ترین نے کہا کہ لودھراں کے لوگوں کی بے لوث خدمت جاری رکھوں گا، دلی خواہش تھی کہ لودھراں میں انفارمیشن ٹیکنالوجی کا جدید ادارہ بناؤں۔

آئی پی پی رہنما نے مزید کہا کہ آمنہ گرلز کالج کے قیام سے بچیوں کو اعلیٰ تعلیم کے لیے کہیں جانا نہیں پڑے گا۔

اُن کا کہنا تھا کہ آئی ٹی یونیورسٹی میں 2500 طلباء و طالبات جدید تعلیم حاصل کرسکیں گے، کوشش ہے قابل طالب علم بیرون ملک سے بھی اعلیٰ تعلیم حاصل کرسکیں۔