کراچی، بھینس کالونی میں بیوپاری سے رقم چھین لی گئی

کراچی کے علاقے بھینس کالونی میں بیوپاری سے رقم چھین لی گئی، گزشتہ روز ہوئی واردات کی سی سی ٹی وی ویڈیو بھی سامنے آگئی۔

پولیس حکام کا کہنا ہے کہ مویشیوں کے چارے کا بیوپاری موٹر سائیکل پر رقم لے کر جارہا تھا، واردات میں ملوث ملزمان دو موٹر سائیکلوں پر سوار تھے۔

پولیس کے مطابق سی سی ٹی وی ویڈیو  میں دیکھا گیا ہے کہ ایک موٹر سائیکل پر خاتون بھی بیٹھی ہوئی ہے۔

ویڈیو میں دیکھا گیا ہے کہ واردات میں ملوث خاتون اور مرد نے ایک بچے کو بھی موٹر سائیکل پر بٹھایا ہوا ہے۔

ویڈیو میں ملزمان کو بیوپاری سے رقم چھینتے دیکھا جاسکتا ہے، متاثرہ شہری نے تھانے میں رپورٹ درج کرادی ہے جبکہ پولیس نے تحقیقات شروع کردی ہے۔

پولیس کا کہنا ہے کہ سی سی ٹی وی ویڈیو کی مدد سے ملزمان کی تلاش جاری  ہے۔