ہسپانوی ٹینس اسٹار رافیل ندال نے اسپین میں لگژری میگا یاٹس کے کاروبار میں قدم رکھ دیا
اسپین/ مایورکا سے تعلق رکھنے والے سابق عالمی نمبر ایک ٹینس کھلاڑی نے اپنی ہولڈنگ کمپنی کے ذریعے اس شعبے میں سرمایہ کاری کی ہے۔
رپورٹ کے مطابق ندال نے اپنی خاندانی سرمایہ کاری کمپنی Aspemir کے ذریعے کمپنی Ocean Platform Marinas (او پی ایم) میں اقلیتی حصص خریدے ہیں۔ یہ کمپنی بڑی جسامت والی کشتیوں اور میگا یاٹس کے لیے بندرگاہوں میں خصوصی برتھ (جہاز کھڑا کرنے کی جگہ) ڈیزائن کرنے اور ان کا انتظام سنبھالنے میں مہارت رکھتی ہے۔ اس سرمایہ کاری کے بعد ندال اب اس کمپنی کے شیئر ہولڈرز میں شامل ہو گئے ہیں۔
یہ کمپنی اس وقت ایبیز اور مالاگا جیسے ساحلی مقامات پر کام کر رہی ہے اور اس کا منصوبہ ہے کہ اسپین کے ساحلی علاقوں میں میگا یاٹس کے لیے خصوصی بندرگاہی انفراسٹرکچر کا ایک نیٹ ورک قائم کیا جائے۔ کمپنی کی قیادت ہسپانوی تاجر José Luis Almazán کر رہے ہیں جبکہ اس کے سرمایہ کاروں میں ایبیزا کا معروف Matutes family اور ملاگا کے کاروباری شخصیت Domingo de Torres بھی شامل ہیں۔
حالیہ برسوں میں ندال کی سرمایہ کاری خاص طور پر Costa del Sol میں بھی بڑھی ہے۔ انہوں نے تعمیراتی کمپنی Sierra Blanca Estates کے ساتھ مل کر ملاگا میں ایک بڑا اسپورٹس کمپلیکس بنانے کا منصوبہ شروع کیا ہے جس میں ٹینس اور پیڈل کورٹ، جم، سوئمنگ پول، اسپا، ریستوران اور ان کے کیریئر سے متعلق ایک میوزیم شامل ہوگا۔
دلچسپ بات یہ ہے کہ ندال نے بطور پیشہ ور ٹینس کھلاڑی اپنا آخری میچ بھی 2024 میں Davis Cup کے موقع پر ملاگا میں کھیلا تھا۔
ندال کی کاروباری سرگرمیوں میں ان کا سب سے نمایاں منصوبہ Rafa Nadal Academy ہے جو Manacor میں واقع ہے۔ 2016 میں قائم ہونے والی یہ اکیڈمی اب عالمی سطح پر ایک معروف اسپورٹس اور تعلیمی مرکز بن چکی ہے۔ یہاں 500 سے زیادہ افراد ملازم ہیں اور ہر سال تقریباً ایک لاکھ افراد اس کے 80 ہزار مربع میٹر پر پھیلے ہوئے جدید کیمپس کا دورہ کرتے ہیں۔
اکیڈمی میں سالانہ تقریباً چار ہزار نوجوان طلبہ رہائش اختیار کرتے ہیں جبکہ بالغ کھلاڑیوں کے لیے بھی خصوصی تربیتی پروگرام موجود ہیں۔ اس کے علاوہ یہاں ایک بین الاقوامی اسکول بھی قائم ہے جس میں 45 مختلف ممالک کے 450 سے زیادہ طلبہ زیرِ تعلیم ہیں۔
اکیڈمی میں 45 ٹینس کورٹ، 16 پیڈل کورٹ، فٹبال گراؤنڈ، تین سوئمنگ پول، فٹنس سینٹر، اسپا اور ایک اسپورٹس کلینک بھی موجود ہے جسے Quirónsalud چلاتی ہے۔ یہاں موجود Rafa Nadal Museum میں ندال کے کیریئر کی اہم ٹرافیاں اور دنیا کے دیگر عظیم کھلاڑیوں کی یادگار اشیاء بھی نمائش کے لیے رکھی گئی ہیں۔
About The Author
