اندالوسیا میں عوامی ہسپتالوں میں مفت وائی فائی کی سب سے بڑی یورپی سہولت متعارف کرا دی گئی
Screenshot
اسپین کے علاقے اندالوسیا میں عوامی ہسپتالوں میں مفت وائی فائی کی سب سے بڑی یورپی سہولت متعارف کرا دی گئی ہے، جس کا مقصد مریضوں کو دورانِ علاج دنیا سے جڑے رہنے کی سہولت فراہم کرنا ہے۔
یہ منصوبہ Juanma Moreno کی قیادت میں مکمل کیا گیا، جنہوں نے Hospital Virgen del Rocío میں اس کا علامتی افتتاح کیا۔ اس موقع پر انہوں نے کہا کہ “مریضوں کا رابطے میں رہنا ان کی تنہائی کم کرتا ہے اور ہسپتال میں گزارے جانے والے دنوں اور گھنٹوں کو آسان بناتا ہے۔”
حکومت کے مطابق 51 ہسپتالوں اور 7 اضافی طبی مراکز میں مجموعی طور پر 18 ہزار انٹرنیٹ ایکسس پوائنٹس نصب کیے گئے ہیں۔ اس نیٹ ورک کو “Andalucía Vuela” کا نام دیا گیا ہے، جس پر تقریباً 18.5 ملین یورو لاگت آئی ہے اور اس میں جدید WIFI6 ٹیکنالوجی استعمال کی گئی ہے۔
یہ سہولت ہسپتالوں میں زیرِ علاج ہزاروں مریضوں، ان کے اہلِ خانہ اور دیگر صارفین کے لیے مکمل طور پر مفت ہوگی، جس میں نہ وقت کی کوئی حد ہوگی اور نہ ہی ڈیٹا استعمال کی کوئی پابندی۔ صارفین اس کے ذریعے ویڈیو کالز، سوشل میڈیا، اسٹریمنگ اور میسجنگ جیسی سہولیات سے بھرپور فائدہ اٹھا سکیں گے، چاہے بیک وقت بڑی تعداد میں لوگ آن لائن ہوں۔
صدر خوانما مورینو کے مطابق، یہ اقدام نہ صرف مریضوں کے لیے نفسیاتی طور پر مددگار ثابت ہوگا بلکہ جدید طبی نظام کے لیے بھی اہم ہے۔ اس وائی فائی نیٹ ورک کو ہسپتالوں کے طبی آلات، سینسرز، اسمارٹ سسٹمز، معلوماتی اسکرینز اور دیگر میڈیکل ڈیوائسز کے ساتھ بھی مربوط کیا جا سکتا ہے، جس سے صحت کے نظام کو مزید تیز، مؤثر اور جدید بنایا جا سکے گا۔
سیکیورٹی کے حوالے سے حکام نے بتایا کہ اس نیٹ ورک میں مضبوط حفاظتی نظام، ڈیٹا انکرپشن، مواد کی فلٹرنگ اور مسلسل اینٹی وائرس نگرانی شامل ہے تاکہ صارفین کا ڈیٹا محفوظ رہے اور کسی بھی سائبر خطرے سے بچاؤ ممکن ہو۔
اس سروس کو استعمال کرنے کے لیے صرف ایک سادہ رجسٹریشن درکار ہے، جس کے لیے موبائل فون نمبر پر تصدیقی کوڈ بھیجا جاتا ہے۔ اب تک 3 لاکھ 76 ہزار سے زائد صارفین اس سہولت سے فائدہ اٹھا چکے ہیں۔
حکومت کا کہنا ہے کہ یہ منصوبہ 2022 میں شروع کیا گیا تھا اور مجموعی طور پر 65 ملین یورو کی سرمایہ کاری سے 10 ہزار 500 سے زائد سرکاری مقامات جیسے صحت مراکز، اسکولوں، عجائب گھروں اور عدالتی دفاتر تک پھیلایا جا چکا ہے۔
About The Author
