پیدروسانچز یورپ میں امریکی صدر کا “سب سے بڑا ناقد” اور ایران جنگ کا مضبوط مخالف قرار،سروے

یورپی اخبار Politico نے ہسپانوی شہریوں پر ایک سروے کیا۔

اگر کوئی ملک ایران جنگ اور امریکی صدر ڈونلڈ ٹرمپ کی پالیسیوں کے خلاف سب سے زیادہ مضبوطی سے سامنے آیا ہے تو وہ اسپین ہے۔ اس میں سب سے آگے وزیرِاعظم پیدروسانچز رہے، جن کا دوٹوک مؤقف “جنگ نہیں” تھا، جس نے ٹرمپ کو اس قدر غصہ دلایا کہ انہوں نے “تمام تعلقات ختم کرنے” جیسی بڑی (لیکن بعد میں بے اثر ثابت ہونے والی) دھمکی دے دی۔

اس کے بعد سے سوشل میڈیا پر ہسپانوی عوام پہلے سے زیادہ متحد نظر آئے، جو جنگ اور ٹرمپ دونوں کے خلاف آواز اٹھا رہے ہیں۔ یورپی اخبار Politico نے ہزاروں افراد سے سروے کیا، جن میں ہسپانوی بھی شامل تھے، اور ان کے مؤقف کو نمایاں کیا۔

Politico کے سروے “European Pulse” کے مطابق، ہسپانوی عوام “ایک مضبوط اور خودمختار یورپ کی قیادت کر رہے ہیں”، جبکہ ٹرمپ کی امریکہ پر “وسیع عدم اعتماد” پایا جاتا ہے۔

سروے میں شامل 51٪ ہسپانویوں نے کہا کہ امریکہ یورپ کے لیے “خطرہ” ہے، جو چھ ممالک میں سب سے زیادہ شرح ہے۔

94٪ افراد کا خیال ہے کہ یورپ کو “زیادہ خود کفیل” ہونا چاہیے

سروے میں ہسپانویوں نے یورپ کی خودمختاری بڑھانے کی بھرپور حمایت کی۔ 94٪ افراد کا کہنا تھا کہ یورپ کو بڑی طاقتوں پر کم انحصار کرتے ہوئے زیادہ خود کفیل ہونا چاہیے، چاہے اس کے لیے بھاری معاشی قیمت ہی کیوں نہ ادا کرنی پڑے۔

مزید یہ کہ زیادہ تر ہسپانوی اس بات پر بھی آمادہ نظر آئے کہ اگر کسی یورپی ملک پر بیرونی طاقت حملہ کرے تو وہ اس کے دفاع کے لیے کھڑے ہوں گے۔

Politico نے سانچز کو یورپ میں امریکی صدر کا “سب سے بڑا ناقد” اور ایران جنگ کا مضبوط مخالف قرار دیا۔

سروے کے مطابق 56٪ ہسپانویوں نے امریکہ اور اسرائیل کی ایران کے خلاف کارروائی کو سختی سے ناپسند کیا، جبکہ 43٪ کا کہنا تھا کہ میڈرڈ حکومت کو اس فوجی کارروائی کی کھل کر مخالفت کرنی چاہیے اور جنگ کے خاتمے کے لیے اقدامات کرنے چاہئیں۔