گرین پیس اور اوپن آرمز سے صمود فلوٹیلا زیادہ مضبوط ہوا ہے،جلد روانگی ہوگی
Screenshot
بارسلونا/کارکنان کو امید ہے کہ وہ ہفتے کے وسط تک روانہ ہو سکیں گے، جب موسمی حالات بہتر ہو جائیں گے۔
تمام تیاریاں مکمل تھیں کہ گلوبل صمود فلوٹیلا اتوار، 12 اپریل کو غزہ کی طرف سفر شروع کرے، مگر خراب موسم اور بحیرہ روم میں چار سے پانچ میٹر بلند لہروں (جبکہ Menorca کے ساحل پر سات میٹر سے بھی زیادہ لہریں ریکارڈ ہوئیں) کی وجہ سے اس مہم کو مؤخر کرنا پڑا۔
اس کے باوجود ایک علامتی روانگی کی گئی، اور اب منتظمین بہتر موسمی حالات کا انتظار کر رہے ہیں تاکہ کارکنان کی سلامتی یقینی بنائی جا سکے۔ فلوٹیلا کی رکن آریادنا ماسمتجا نے پیر کی صبح ایک پروگرام میں بتایا“ابھی کوئی حتمی تاریخ نہیں، مگر اندازہ ہے کہ ہم ہفتے کے وسط میں روانہ ہوں گے، یہ سب موسم پر منحصر ہے۔”
کشتیوں نے بارسلونا کے “مول دے لا فُستا” سے روانگی اختیار کی اور شہر کے ایک اور بندرگاہ کی طرف گئیں۔ ماسمتجا نے کہا کہ اس بار فلوٹیلا پہلے سے بڑی اور زیادہ منظم ہے، اور اوپن آرمز اور گرین پیس کی حمایت انہیں زیادہ نمایاں اور محفوظ بناتی ہے“ان کی مدد ہمیں تحفظ دیتی ہے اور لاجسٹک اور تکنیکی سہولت فراہم کرتی ہے۔”
پچھلے سفر میں یہ فلوٹیلا غزہ پہنچنے سے چند میل پہلے رک گئی تھی۔ اس بار مقصد یہ ہے کہ وہاں پہنچ کر مقامی لوگوں کے ساتھ مل کر تعمیرِ نو کے کام میں حصہ لیا جائے، جیسا کہ فلسطینی عوام کی خواہش ہے۔
ماسمتجا نے کہا“ہم جانتے ہیں کہ ہم ایک ایسے طاقتور اور جارح نظام کے خلاف جا رہے ہیں جو فلسطینی عوام کو زندہ رہنے کے حق سے محروم کرنا چاہتا ہے۔”انہوں نے یہ بھی کہا کہ امکان ہے کہ انہیں غزہ کی حدود تک پہنچنے سے پہلے ہی روکنے کی کوشش کی جائے گی۔
گزشتہ تجربے سے سیکھتے ہوئے اس بار فلوٹیلا نے بہتر تیاری کی ہے۔ کشتیوں کو زیادہ مضبوط بنایا گیا ہے اور نئے شامل ہونے والے افراد کو باقاعدہ تربیت دی گئی ہے۔
ماسمتجا کے مطابق موجودہ عالمی حالات توجہ کو تقسیم کر دیتے ہیں، مگر انہوں نے زور دیا کہ“غزہ کی صورتحال ایک ایسے عالمی نظام کا نتیجہ ہے جو لوگوں کو دبانے کا سبب بنتا ہے۔ فلسطین کا مسئلہ دراصل پوری دنیا میں ہونے والے حالات کی عکاسی ہے۔ فلسطین کے لیے جدوجہد کرنا دنیا کے ہر خطے کے تحفظ کے لیے جدوجہد ہے۔”
About The Author
