بارسلونا میں تارکینِ وطن کی ریگولرائزیشن کے لیے طویل قطاریں، ہزاروں درخواستیں جمع

بارسلونا میں گوتھک کوارٹر کے علاقے میں تارکینِ وطن کی بڑی تعداد امیگریشن دستاویزات اور قانونی حیثیت کے حصول کے لیے قطاروں میں کھڑی نظر آ رہی ہے۔ یہ عمل ہسپانوی حکومت کے اس منصوبے کا حصہ ہے جس کے تحت تقریباً 5 لاکھ تارکینِ وطن کو قانونی حیثیت دیے جانے کی توقع ہے۔

حکومتی اعلان کے مطابق یہ ریگولرائزیشن اسکیم جنوری میں شروع کی گئی تھی جبکہ درخواستوں کا باقاعدہ آغاز 16 اپریل کو ہوا۔ اس کے بعد سے اب تک 1 لاکھ 30 ہزار سے زائد درخواستیں جمع ہو چکی ہیں، جبکہ مزید 55 ہزار افراد نے 30 اپریل تک کے لیے اپوائنٹمنٹس حاصل کر لی ہیں۔

میڈیا رپورٹس کے مطابق قونصل خانوں اور سرکاری دفاتر کے باہر طویل قطاریں معمول بن چکی ہیں۔ درخواست دہندگان کا کہنا ہے کہ 30 جون کی آخری تاریخ سے پہلے تمام دستاویزات مکمل کرنا مشکل ہوتا جا رہا ہے، جس کی وجہ سے صورتحال کو “انتہائی افراتفری” قرار دیا جا رہا ہے۔

کچھ افراد نے یہ بھی دعویٰ کیا ہے کہ اپوائنٹمنٹ سلاٹس کی غیر قانونی خرید و فروخت ہو رہی ہے، جہاں لوگ تقریباً 30 یورو ادا کر کے وقت حاصل کر رہے ہیں تاکہ وہ مقررہ وقت میں اپنی درخواست مکمل کر سکیں۔

درخواست دہندگان اور مقامی کمیونٹی کی جانب سے بڑھتے ہوئے دباؤ کے باعث اس عمل کی مدت میں توسیع کے مطالبات بھی سامنے آ رہے ہیں۔