ہسپانوی وزیرِاعظم پیدروسانچز کا ہینٹا وائرس کے متاثرین کے انتظام پر اختلافات کے بعد کینیری جزائر کے صدر فرنیندو کلاویخو سے رابطہ

میڈرڈ / وزیرِاعظم پیدرو سانچیز نے جمعرات کے روز کینیری جزائر کے صدر فرنیندو کلاویخو کو فون کیا۔ یہ رابطہ اس تنازع کے بعد ہوا جو مرکزی حکومت کے اس فیصلے پر پیدا ہوا تھا کہ ہینٹا وائرس کے پھیلاؤ سے متاثرہ کروز جہاز “MV Hondius” کو تینیریف کے جنوبی علاقے میں واقع گرینادیلا کی ثانوی بندرگاہ پر لنگر انداز ہونے کی اجازت دی جائے، تاکہ عملے اور مسافروں کو طبی امداد فراہم کی جا سکے۔ ان مسافروں میں 14 ہسپانوی شہری بھی شامل ہیں۔

وزیراعظم ہاؤس (مونکلوآ) کے ذرائع کے مطابق دونوں رہنماؤں کے درمیان یہ گفتگو ادارہ جاتی تعاون اور موجودہ صورتحال میں درکار باہمی اعتماد کے تناظر میں ہوئی۔

مرکزی حکومت نے منگل کے روز اس جہاز کو کینیری جزائر میں رکنے کی اجازت دی تھی، جس کی درخواست ورلڈ ہیلتھ آرگنائزیشن اور یورپی یونین کی جانب سے کی گئی تھی۔

حکام کے مطابق، جب جہاز تینیریف کے جنوبی ساحل پر واقع بندرگاہ پر پہنچے گا تو اس میں سوار 14 ہسپانوی شہریوں کو فوجی طیارے کے ذریعے میڈرڈ منتقل کیا جائے گا، جہاں انہیں Hospital Central de la Defensa Gómez Ulla میں طبی سہولیات فراہم کی جائیں گی۔ یہ بات وزیرِ صحت مونیکا گارسیا اور وزیرِ داخلہ فرنیندو گراندے مارلاسکا نے بدھ کے روز بتائی۔