فورمولا 1 کی “فین ولیج” کی تیاری کے لیے پلاسا دے کاتالونیا بند کر دی گئی

گزشتہ سال “فین ولیج” فارمولا 1 کے گراں پری کا ایک اہم مرکزِ کشش تھی، جسے 80,000 سے زائد افراد نے وزٹ کیا

بارسلونا(دوست نیوز)مونتملو گراں پری کے موقع پر، شہر کے مرکز میں اس ہفتے کے اختتام سے لے کر 31 مئی تک دوبارہ “فین ولیج” قائم کی جائے گی۔ اسی وجہ سے، پلاسا دے کاتالونیا کو پہلے ہی عوام کے لیے بند کر دیا گیا ہے، اور وہاں ان خیموں کی تنصیب شروع ہو چکی ہے جن میں تمام عمر کے افراد کے لیے سرگرمیاں، تجربات اور تفریحی پروگرام منعقد ہوں گے۔ اس اقدام کا مقصد یہ ہے کہ فورمولا 1 کو شہریوں کے قریب لایا جا سکے — اور وہ بھی مفت۔

گزشتہ سال یہ “فین ولیج” فارمولا 1 گراں پری کا ایک بڑا کشش کا مرکز بنی تھی، اور اس مقام کو 80,000 سے زائد افراد نے وزٹ کیا تھا۔ تاہم، اس سال شہر “پاسے دی گراسیا” پر فارمولا 1 کاروں کی نمائش دوبارہ نہیں کرے گا، جیسا کہ گزشتہ سال کیا گیا تھا۔

اس مقام پر دنیا کی کچھ اہم ٹیموں کی فارمولا کاروں کی نمائش دیکھی جا سکے گی۔ اس کے علاوہ ڈرائیونگ کے سِمیولیٹرز، لائیو میوزک، کھانے پینے کی چیزیں اور ایک بڑی اسکرین بھی نصب ہو گی، جس پر اس ہفتے کے اختتام پر ہونے والی موناکو گراں پری کو براہِ راست دکھایا جائے گا۔

تاہم سب سے اہم ایونٹ بدھ 28 مئی کو شام 7 بجے ہو گا، جب موجودہ فارمولا 1 ورلڈ چیمپئن شپ کے کچھ ڈرائیورز کی موجودگی میں “فین فورم” منعقد کیا جائے گا۔