ماضی کی معروف اداکارہ جاناں ملک ان دنوں کہاں ہیں؟
ماضی کی معروف پاکستانی اداکارہ جاناں ملک گزشتہ چند برسوں سے اسکرین سے تو دور ہیں ہی لیکن پچھلے ایک سال سے انہوں نے اپنے کاروبار سے بھی دوری اختیار کی ہوئی ہے۔
فوٹو اینڈ ویڈیو شیئرنگ پلیٹ فارم انسٹاگرام پر جاناں ملک نے حال ہی میں ایک ویڈیو شیئر کی اور مداحوں سے دلچسپ سوال بھی کیا۔
ان دنوں ماضی کی معروف اداکارہ جاناں ملک کینیڈا کے شہر وینکوور میں مقیم ہیں جہاں سردی اور برفباری سے لطف اندوز ہو رہی ہیں۔
ان کی جانب سے شیئر کی گئی ویڈیو میں انہیں شدید برفباری کے دوران خریداری کر کے واپس گھر جاتے ہوئے دیکھا جاسکتا ہے۔ انہوں نے ویڈیو میں مداحوں سے دلچسپ سوال بھی کیا کہ ’برفباری کے لیے کون سا لفظ استعمال کرتے ہیں کہ برفباری زیادہ ہو رہی ہے یا برفباری تیز ہو رہی ہے‘۔
جاناں ملک نے ویڈیو کے علاوہ چند تصاویر بھی شیئر کی ہیں جس میں ان کی رہائش گاہ کو شدید برف کی لپیٹ میں دیکھا جاسکتا ہے جبکہ ایک تصویر میں اسنو مین بھی موجود ہے۔
انہوں نے مختلف ویڈیوز اور تصاویر کے ساتھ کیپشن میں لکھا کہ مجھے سردیاں نہیں پسند لیکن برفباری پسند ہے۔
واضح رہے کہ جاناں ملک شوبز انڈسٹری کا جانا پہچانا نام ہیں۔ انہوں نے اپنے کیرئیر کا آغاز پی ٹی وی کے ڈرامہ سیریل ریزگار سے کیا تھا، وہ جیو کہانی کے ڈرامہ سیریل ناگن میں بھی اپنی اداکاری کے جوہر دِکھا چکی ہیں۔ ڈرامہ سیریل ناگن 2017 سے 2019 تک جیو کہانی پر نشر کیا گیا تھا۔
اداکارہ آج کل بیکنگ کے شعبے سے جڑی ہوئی ہیں اور آرڈر پر سالگرہ کے خوبصورت کیک تیار کرتی ہیں۔ تاہم گزشتہ ایک برس سے وہ اس کاروبار سے بھی دور ہیں۔
انہوں نے ایک برس قبل اپنے انسٹاپیج پر آخری پوسٹ شیئر کرتے ہوئے اعلان کیا تھا کہ وہ چھٹیوں پر جارہی ہیں۔
واضح رہے کہ جاناں ملک نے 2016 میں گلوکار نعمان جاوید سے شادی کی تھی جو کہ ایک سال بعد ہی ٹوٹ گئی تھی۔
