سانت آدریا دے بیسوس میں ’روشنی کا کرسمس جنگل‘ سجایا جائے گا
سانت آدریا دے بیسوس کی بلدیہ اس سال ایک منفرد کرسمس کشش متعارف کرا رہی ہے۔ رامبلیتا(paseo de la Rambleta.) کے مرکزی راستے پر 60 ہزار یورو کی لاگت سے ’’روشنی کا جنگل‘‘ تیار کیا جائے گا جو نومبر کے آخر سے لے کر 11 جنوری 2026 تک جاری رہے گا۔
یہ منصوبہ شہر کی ثقافتی و سیاحتی حکمت عملی کا حصہ ہے، جس کے تحت رامبلیتا کو ایک جادوئی جنگل میں بدلا جائے گا۔ یہاں تین میٹر بلند مخروطی درخت، ہرن، ایلف، دیوہیکل مٹھائیاں اور دیگر تھری ڈائمینشنل روشنیوں سے سجی ہوئی اشکال نصب کی جائیں گی۔ کچھ ڈھانچوں کے اندر سے گزرنے کی سہولت بھی ہوگی تاکہ شہری اور سیاح انہیں فوٹو کال کے طور پر استعمال کرسکیں۔
تمام ڈیزائن توانائی بچانے والی ایل ای ڈی ٹیکنالوجی سے روشن کیے جائیں گے۔
اس کے ساتھ ہی بلدیہ آرک کے چوک میں شہر کے نام ’’Sant Adrià‘‘ کی بڑی روشن حروف بھی نصب کرے گی تاکہ شہری شناخت کو مزید اجاگر کیا جاسکے۔
میئر فِلو کانیتے کے مطابق:“سیاحتی ٹیکس سے حاصل ہونے والی آمدنی کی بدولت ہم دو منصوبوں پر کام کر رہے ہیں: رامبلیتا میں کرسمس کا ’روشنی کا جنگل‘ اور آرک کے چوک پر بڑے روشن حروف۔ امید ہے کہ دونوں ٹینڈرز کامیاب ہوں گے۔”
ان اقدامات کے ذریعے سانت آدریا کو کرسمس سیزن میں میٹروپولیٹن علاقے کی ایک پرکشش منزل بنانے کی کوشش کی جا رہی ہے۔
About The Author
