یو جی ٹی کا پی ایس سی اور کومونس سے مکانوں کی قیاسی خرید و فروخت روکنے کے قانون پر اختلافات ختم کرنے کا مطالبہ، کرایہ داروں کی مشکلات میں مسلسل اضافہ
کاتالونیا میں گزشتہ دس برسوں کے دوران مکانوں کے کرایوں میں ہونے والے اضافے کے مقابلے میں اگر تنخواہوں میں بھی اسی تناسب سے اضافہ ہوتا تو آج یہاں اوسط ماہانہ تنخواہ 3,223 یورو مجموعی (ٹیکس کٹوتی سے پہلے) ہوتی، جبکہ حقیقت میں یہ صرف 2,644 یورو ہے۔ یعنی ملازمین کو ہر ماہ تقریباً 600 یورو کم مل رہے ہیں۔
یہ اعداد و شمار مزدور تنظیم یو جی ٹی (UGT) کاتالونیا کی جانب سے جمعے کے روز جاری کردہ ایک رپورٹ میں پیش کیے گئے ہیں۔ رپورٹ کے مطابق گزشتہ دس برسوں میں کاتالونیا میں تنخواہوں میں 29.4 فیصد اضافہ ہوا، جبکہ مکانوں کے کرایوں میں فی مربع میٹر 60 فیصد اور مکانوں کی خریداری کی قیمتوں میں 96 فیصد اضافہ ریکارڈ کیا گیا۔
یو جی ٹی کاتالونیا کے جنرل سیکریٹری کامل روس نے کہا کہ مہنگائی اور رہائش کے اخراجات میں اضافے نے عام شہریوں کی قوتِ خرید کو شدید متاثر کیا ہے۔ ان کے مطابق صرف تنخواہوں میں اضافہ کافی نہیں، بلکہ مکانوں کے کرایوں میں کمی بھی ضروری ہے۔
رپورٹ کے مطابق 2015ء میں ایک اوسط ملازم اپنی آمدنی کا 32.1 فیصد مکان کے کرائے پر خرچ کرتا تھا، جبکہ اب یہ شرح بڑھ کر 39.4 فیصد ہو چکی ہے۔ اسی طرح درمیانی سطح کی تنخواہ حاصل کرنے والے افراد اپنی آمدنی کا 45.2 فیصد کرائے پر خرچ کر رہے ہیں۔ بینک آف اسپین کی سفارش ہے کہ کسی بھی گھرانے کی آمدنی کا 30 فیصد سے زیادہ حصہ رہائش پر خرچ نہیں ہونا چاہیے۔
کامل روس نے کاتالونیا کی حکمران جماعت پی ایس سی اور کومونس کے درمیان مکانوں کی قیاسی خریداری محدود کرنے کے مجوزہ قانون پر اختلافات ختم کرنے پر زور دیا ہے۔ ان کے مطابق رہائشی بحران سے نمٹنے کے لیے ضابطہ بندی ضروری ہے۔
مجوزہ قانون کے تحت ان علاقوں میں مکانوں کی خریداری کو سیاحتی مقاصد، عارضی کرائے یا کمروں کی صورت میں کرائے پر دینے کے لیے استعمال کرنے سے روکنے کی کوشش کی جا رہی ہے جہاں رہائش کا بحران سرکاری طور پر تسلیم کیا گیا ہے۔
دوسری جانب کومونس کا مطالبہ ہے کہ ایک ہی مالک کے پاس موجود مکانوں کی تعداد کی واضح حد مقرر کی جائے۔
یو جی ٹی نے 11 نومبر کو ہونے والی عام ہڑتال کے حوالے سے بھی تنخواہوں میں اضافے اور کرایوں میں کمی کو اپنے اہم مطالبات قرار دیا ہے۔
