’لا تاردے سے مووی‘ پروگرام میں واقعے کی تفصیلات سامنے آگئیں، منیر نصراؤئی نے صحافیوں سے کہا: ’’کیا چاہتے ہو، کتا تمہیں کاٹ لے؟‘‘
بارسلونا فٹبال کلب کے نوجوان اسٹار لامین یامال کے والد منیر نصراؤئی ایک بار پھر خبروں کی زینت بن گئے ہیں۔ اس مرتبہ ان کا صحافیوں کے ساتھ تلخ جملوں کا تبادلہ ہوا، جس کی تفصیلات ٹیلی ویژن پروگرام ’’لا تاردے سے مووی‘‘ میں سامنے آئی ہیں۔
گزشتہ چند ہفتوں سے لامین یامال فٹبال کی دنیا میں خاصی توجہ کا مرکز رہے ہیں۔ ہسپانوی قومی ٹیم کے ساتھ عالمی چیمپئن بننے والے لامین یامال بیلن سی اور ایوارڈ کی ووٹنگ میں تیسرے نمبر پر رہے، تاہم انہیں بہترین نوجوان فٹبالر کا کوپا ٹرافی ایوارڈ دیا گیا۔ اس نتیجے کے بعد سوشل میڈیا پر ان کی کارکردگی اور دیگر کھلاڑیوں کے ساتھ موازنے پر بحث جاری رہی۔
تاہم ان کے والد منیر نصراؤئی کا نام بھی حالیہ دنوں میں مختلف خبروں کے حوالے سے سامنے آیا ہے۔
اطلاعات کے مطابق بیلن دی اور ایوارڈ کی تقریب سے چند روز قبل بارسلونا کے جوزپ تارادیاس بارسلونا ایل پراٹ ایئرپورٹ کے ایک کیفے میں مبینہ طور پر ان کا ایک خاتون ملازمہ کے ساتھ جھگڑا ہوا تھا۔
عینی شاہدین کے مطابق منیر نصراؤئی نے کیفے کے ایک ممنوعہ حصے میں اپنی جیکٹ رکھی ہوئی تھی، جس پر ایک ویٹریس نے انہیں منع کیا۔ اس کے بعد مبینہ طور پر تلخ کلامی ہوئی اور انہوں نے خاتون کے ساتھ بدتمیزی کرتے ہوئے اس کے چہرے پر تھوک دیا۔ ایک شخص نے خاتون کی حمایت میں مداخلت کی تو مبینہ طور پر اس کے ساتھ بھی ہاتھا پائی کی کوشش کی گئی۔
واقعے کے بعد گواردیا سول پولیس موقع پر پہنچی اور منیر نصراؤئی کو کچھ دیر کے لیے روکے رکھا، جس کے بعد وہ بیلن دی اور تقریب میں شرکت کے لیے لندن روانہ ہوگئے۔
صحافیوں کی جانب سے واقعے کے بارے میں پوچھے جانے پر انہوں نے تمام الزامات کی تردید کرتے ہوئے طنزیہ انداز میں کہا:
’’کون سا واقعہ؟ یہ سب جھوٹ ہے۔ شاید اس لیے کہ میرے پاس کاغذات نہیں ہیں۔‘‘
اس واقعے کے بعد ٹیلی 5 کے پروگرام ’’لا تاردے سے مووی‘‘ کے رپورٹر مارک لیرادو نے منیر نصراؤئی کے ساتھ ایک اور ناخوشگوار صورت حال کی تفصیلات بیان کیں۔
رپورٹر کے مطابق منیر نصراؤئی نے صحافیوں کے ساتھ تعاون کرنے کے بجائے مبینہ طور پر اپنے کتے کو ان کی جانب چھوڑنے کی کوشش کی۔ کتا بغیر مزل (منہ پر حفاظتی جالی) کے تھا اور کیمرہ مین کے پیچھے بھاگنے لگا۔
رپورٹر نے پروگرام کے میزبان آئن آرامندی کو بتایا کہ منیر نصراؤئی نے صحافیوں سے گفتگو کے دوران کہا:
’’کیا چاہتے ہو کہ کتا تمہیں کاٹ لے؟ میں کتے کے ساتھ ہوں، یہ تمہیں کاٹ لے گا۔ میں ایسا شخص ہوں جو جلد غصے میں آجاتا ہے۔ کیا چاہتے ہو کہ میں ناراض ہوجاؤں؟ میں کسی سے بات نہیں کرنا چاہتا۔ جاؤ، اس لڑکی سے پوچھو۔ میں انسان ہوں، کوئی جانور نہیں۔‘‘
واضح رہے کہ ایئرپورٹ کیفے میں پیش آنے والے واقعے سے متعلق الزامات اور صحافیوں کے ساتھ تازہ تلخ کلامی کی تفصیلات مختلف ذرائع ابلاغ کی رپورٹس پر مبنی ہیں۔
