انتہاپسندی کے خلاف اگلا عالمی فورم 2026 میں میڈرڈ میں ہوگا،سانچیز کا اعلان
میڈرڈ / 24 ستمبر 2025 (دوست نیوز) –وزیر اعظم اسپین پیدرو سانچیز نے نیویارک میں منعقدہ فورم “جمہوریت کے دفاع میں، انتہاپسندی کے خلاف جدوجہد” میں شرکت کے دوران اعلان کیا ہے کہ اس اجلاس کا اگلا ایڈیشن 2026 میں میڈرڈ میں منعقد ہوگا۔ اس موقع پر ان کے ساتھ برازیل کے صدر لولا دا سلوا، چلی کے صدر گیبریل بورک، کولمبیا کے صدر گستاوو پیٹرو اور یوراگوئے کے صدر یاماندو اورسی بھی شریک تھے، جو اقوام متحدہ کی جنرل اسمبلی کے 80ویں اجلاس کے لیے امریکہ میں موجود ہیں۔
اجلاس کی اختتامی تقریب میں سابق صدرِ چلی اور اقوام متحدہ کی آئندہ سیکریٹری جنرل کے عہدے کی امیدوار میشیل باشلیٹ کے ساتھ ساتھ سینیگال کے صدر باسرو دیومائے فائے نے بھی شرکت کی۔
پیدرو سانچیز نے کہا کہ “ہم کوشش کریں گے کہ ہم توقعات پر پورا اتریں۔” انہوں نے واضح کیا کہ اس فورم کے شرکا نے باہمی اتفاق سے ایک ایسا نیٹ ورک قائم کرنے پر رضامندی ظاہر کی ہے جس میں “جمہوری اور ترقی پسندانہ” نوعیت کے تھنک ٹینکس شامل ہوں گے۔ اس کے ساتھ ساتھ ٹیکنالوجی کی گورننس کو “انسانوں کی خدمت” میں لانے اور “موسمیاتی تبدیلی سے متعلق گمراہ کن معلومات” کے خلاف مشترکہ جدوجہد پر بھی اتفاق کیا گیا۔
سانچیز کے مطابق یہ فیصلے ان نکات کا تسلسل ہیں جو رواں برس چلی میں ہونے والے فورم میں طے پائے تھے، تاہم انہوں نے اعتراف کیا کہ ابھی مزید کام باقی ہے، بالخصوص زیادہ خواتین کی شمولیت اور ایشیائی ممالک کی نمائندگی کو یقینی بنانا ضروری ہے
About The Author
