بارسلونا،اسپین کے شہر بارسلونا کے ضلع گراسیا (Gràcia) میں میونسپل انتظامیہ نے 24 گھنٹے کھلی رہنے والی 11 سپر مارکیٹوں کو مختلف خلاف ورزیوں کے باعث عارضی طور پر سیل کر دیا ہے۔ یہ کارروائی شہر میں 24 گھنٹے کھلی رہنے والی دکانوں کے خلاف جاری معائنہ مہم کے تحت کی گئی۔
بلدیہ بارسلونا کے مطابق 29 اکتوبر کو ضلع گراسیا میں مجموعی طور پر 23 سپر مارکیٹوں اور دیگر کھانے پینے کی اشیا فروخت کرنے والی دکانوں کا معائنہ کیا گیا، جس کے دوران مختلف نوعیت کی 242 خلاف ورزیاں سامنے آئیں۔
سیل کی جانے والی 11 دکانوں میں سے 9 میں بجلی کی تنصیبات کے ساتھ غیر قانونی چھیڑ چھاڑ پائی گئی، جبکہ 3 دکانوں کے اندر حشرات اور کیڑوں کی موجودگی کا انکشاف ہوا۔ بعض دکانوں میں دونوں نوعیت کی خلاف ورزیاں بھی سامنے آئیں۔
معائنوں کے دوران سامنے آنے والی 242 خلاف ورزیوں میں سب سے زیادہ 99 دکانوں کے کاروباری لائسنس اور سرگرمیوں سے متعلق تھیں۔ اس کے علاوہ 52 خلاف ورزیاں شہری منظرنامے اور دکانوں کی ظاہری حالت، 23 صحت عامہ، 23 کچرے کی تلفی، 15 بلدیاتی ٹیکس، 15 ریاستی ٹیکس اور 5 عوامی مقامات کے استعمال سے متعلق ریکارڈ کی گئیں۔ دیگر خلاف ورزیوں میں کچرے کے انتظام سے متعلق معاملات بھی شامل تھے۔
یہ کارروائی بارسلونا کے بلدیاتی منصوبے ‘‘Pla Endreça’’ کے تحت کی گئی، جس میں میونسپل اداروں، پولیس اہلکاروں، سرکاری عملے اور بجلی کمپنی ایندیسا کے تکنیکی ماہرین سمیت تقریباً 100 افراد نے حصہ لیا۔
بارسلونا کی نائب میئر لائیا بونیت کے مطابق 23 میں سے 11 دکانوں کو بند کرنا ایک اہم تعداد ہے، جو ان کے بقول گزشتہ برسوں میں 24 گھنٹے کھلی رہنے والی دکانوں کی بڑھتی ہوئی تعداد کے ساتھ مختلف خلاف ورزیوں میں اضافے کی نشاندہی کرتی ہے۔
بلدیہ کے مطابق نومبر 2023 سے اب تک بارسلونا کے مختلف اضلاع میں 682 سپر مارکیٹوں کا معائنہ کیا جا چکا ہے، جن میں مجموعی طور پر 5,097 خلاف ورزیاں سامنے آئیں، جبکہ سامان ضبط کرنے اور دکانیں سیل کرنے سمیت 110 احتیاطی اقدامات کیے گئے ہیں۔
