بارسلونا،مجرموں کے خلاف بڑے پیمانے پر کریک ڈاؤن ،800 سے زائد پولیس اہلکاروں نے حصہ لیا

بارسلونا(دوست مانیٹرنگ ڈیسک)بارسلونا اور آس پاس کے شہروں میں سیکڑوں بار واردات کرنے والے مجرموں کے خلاف بڑے پیمانے پر کریک ڈاؤن کیا گیا، جس میں 800 سے زائد پولیس اہلکاروں نے حصہ لیا۔ اس کارروائی میں کاتالونیا کی پولیس موسوس دی اسکوادرا، اسپین کی نیشنل پولیس، مقامی پولیس اور پورٹ پولیس شامل تھیں۔

آپریشن بارسلونا کے ساتھ ساتھ بادالونا، سانت آدریا، سانتا کولا ما، اوہسپیتالیت، ایسپلوگس، کورنیّا اور ایل پرات میں بھی کیا گیا۔ اہم تنصیبات جیسے ایئرپورٹ اور میٹرو نیٹ ورک میں بھی سخت نگرانی رہی۔

یہ کارروائی اپریل سے شروع ہونے والے “کانپائی پلان” کا دسواں مرحلہ تھا۔ کاتالونیا کی وزیر داخلہ نوریا پارلون نے آپریشن سے پہلے بریفنگ میں کہا کہ مقصد ایسے مجرموں کی بے خوفی ختم کرنا ہے جو بار بار جرائم کرتے ہیں۔ انہوں نے اس منصوبے کو رہائشیوں کے احساسِ تحفظ میں اضافہ اور جرائم پیشہ افراد کو باز رکھنے کے لیے مؤثر قرار دیا۔

آپریشن جمعہ دوپہر 2:30 بجے سے ہفتہ صبح 6 بجے تک جاری رہا، جس میں یونٹس، فضائی ٹیمیں، پولیس ڈاگ یونٹس (K9) اور دیگر کئی شعبوں نے حصہ لیا۔

ٹرانسپورٹ ڈویژن نے تیراسا، اوہسپیتالیت دی لوبریگا، اور ساگریرا جیسے میٹرو اسٹیشنوں پر چیکنگ کی۔ پولیس کا کہنا ہے کہ ساگریرا ایک بڑا مرکز ہے جہاں مختلف پس منظر کے لوگ سفر کرتے ہیں، اس لیے وہاں غیر قانونی ہتھیار، چاقو وغیرہ پکڑنے پر خاص توجہ دی گئی۔ جمعے کی کارروائی میں چار سے چھ چاقو، بڑی تعداد میں چوری شدہ ٹرانسپورٹ ٹکٹ، متعدد منشیات اور پانچ سرگرم جیب تراش پکڑے گئے۔

آرک دے تریومف میٹرو اسٹیشن پر ایک جیب کترا جاپانی سیاحوں سے چوری کی کوشش کرتے ہوئے پولیس کو دیکھ کر ٹنل میں بھاگ نکلا، جس کے باعث میٹرو سروس عارضی طور پر روکنی پڑی۔ پولیس نے اسے بعد میں ڈکیتی، قانون نافذ کرنے والوں کی نافرمانی اور عوامی خلل کے الزامات میں گرفتار کر لیا۔ حکام کے مطابق وہ تشدد آمیز وارداتوں میں کئی بار ملوث رہ چکا ہے۔