کاتالونیا میں شدید موسمی صورتحال کا الرٹ، پیر اور منگل کو 150 لیٹر سے زائد بارش اور بھاری برفباری کا خدشہ
Screenshot
بارسلونا: کاتالونیا گزشتہ جمعے سے شدید موسمی نظام کی زد میں ہے، جہاں طوفان ’’ہیری‘‘ کے باعث تیز بارشیں، آندھیاں اور ساحلی علاقوں میں خطرناک کیفیت پیدا ہو چکی ہے۔ اس صورتحال کے پیش نظر محکمہ موسمیات نے کئی ساحلی علاقوں میں زیادہ سے زیادہ خطرے کا سرخ الرٹ جاری کر دیا ہے۔
گزشتہ ہفتے کے اختتام پر بھی خطے بھر میں موسلا دھار بارشوں نے معمولات زندگی متاثر کیے، جبکہ موسمی انتباہات منگل تک برقرار رہنے کا امکان ہے۔ اگرچہ اتوار کی شام بارش میں کچھ کمی دیکھی گئی، تاہم پیر کے روز طوفان ایک بار پھر شدت اختیار کر گیا ہے۔ پورے کاتالونیا میں آسمان ابر آلود ہے اور خاص طور پر شمال مشرقی علاقوں میں بارش زور پکڑ چکی ہے۔
محکمہ موسمیات کے مطابق صوبہ جیرونا میں پیر بھر شدید بارش کا امکان ہے، جہاں بعض مقامات پر 50 لیٹر فی مربع میٹر سے زیادہ اور کہیں کہیں 100 لیٹر تک بارش ہو سکتی ہے۔ آلت اور بائکس ایمپوردا، پلا دی لیستانی اور گیرونیس میں نارنجی الرٹ جبکہ گاروچا اور لا سیلوا میں پیلا الرٹ نافذ ہے۔
بارسلونا کے ساحلی اور پری لیتورل علاقوں میں بھی دن بھر بارش کا سلسلہ جاری رہے گا۔ دوپہر کے بعد بارش کی شدت میں اضافہ متوقع ہے اور 30 سے 40 لیٹر فی مربع میٹر تک پانی برس سکتا ہے۔ اسی وجہ سے اوسونا اور ویایس اورینتل میں پیلا الرٹ برقرار رکھا گیا ہے۔
پیر کے روز برفباری بھی موسمی منظرنامے کا اہم حصہ رہے گی۔ مشرقی پیرینیئس اور پری پیرینیئس میں خاص طور پر ریپوییس (جیرونا) کے علاقے میں بھاری برفباری متوقع ہے، جہاں نارنجی الرٹ جاری کر دیا گیا ہے۔
برفباری کی سطح 1,400 سے 1,600 میٹر کے درمیان رہے گی اور بلند علاقوں میں 30 سینٹی میٹر سے زائد نئی برف جمع ہونے کا امکان ہے۔
حکام نے شہریوں کو احتیاطی تدابیر اختیار کرنے، غیر ضروری سفر سے گریز اور موسمی انتباہات پر مسلسل نظر رکھنے کی ہدایت کی ہے۔
About The Author
