بچوں کے دودھ پاؤڈر دامیراکے بعض لاٹس مارکیٹ سے واپس، مضر زہر کی موجودگی کا انکشاف

بارسلونا(دوست نیوز)کمپنی لیکتالس نیوٹریشن آئیبیریا نے بچوں کے دودھ پاؤڈر کی معروف برانڈ دامیرا کے چند مخصوص لاٹس رضاکارانہ طور پر مارکیٹ سے واپس لینے کا اعلان کیا ہے۔ یہ فیصلہ ایک جزو میں سیریولائیڈا نامی زہریلے مادے کی ممکنہ موجودگی کے خدشے کے بعد کیا گیا، جو بچوں میں قے اور اسہال جیسے ہاضمے کے مسائل پیدا کر سکتا ہے۔

یہ کارروائی فرانس کی بچوں کی غذائیت سے متعلق پیشہ ورانہ تنظیم کی جانب سے جاری کردہ الرٹ کے بعد عمل میں لائی گئی۔ کمپنی کے مطابق یہ زہریلا مادہ ایک بین الاقوامی سپلائر کی جانب سے فراہم کردہ جزو اومیگا 6 (ARA) میں پایا جا سکتا ہے، جو بعض بچوں کے دودھ میں استعمال ہوا ہے۔

متاثرہ مصنوعات کی تفصیل

کمپنی کے مطابق درج ذیل دو مصنوعات متاثر ہوئی ہیں:

Damira Natur 2 (800 گرام)
لاٹ نمبر: 8000003302
تاریخِ تنسیخ: 29 جنوری 2027
Damira Natur 1 (800 گرام)
لاٹ نمبر: 8000003307
تاریخِ تنسیخ: 19 فروری 2027

کمپنی نے واضح کیا ہے کہ ان کے علاوہ دامیرا کی تمام دیگر مصنوعات اور انہی مصنوعات کے باقی لاٹس مکمل طور پر محفوظ ہیں اور بلا خوف استعمال کی جا سکتی ہیں۔

لیکٹالس نیوٹریشن آئیبیریا نے والدین سے اپیل کی ہے کہ وہ مذکورہ لاٹس کی مصنوعات استعمال نہ کریں اور انہیں دکان پر واپس بھی نہ لے جائیں۔ کمپنی نے متاثرہ پیک پر درج لاٹ نمبر کی واضح تصویر کھینچنے کی درخواست کی ہے تاکہ صارفین کو معاوضے کے عمل میں مدد مل سکے۔ آخر میں ان مصنوعات کو ضائع کرنے کی ہدایت بھی کی گئی ہے۔

صارفین کی رہنمائی کے لیے کمپنی نے ایک مفت ہیلپ لائن نمبر 900 10 23 36 بھی جاری کیا ہے۔

کمپنی کا کہنا ہے کہ ابتدائی تجزیوں میں جزو اور تیار شدہ دودھ دونوں کے نتائج تسلی بخش تھے، تاہم احتیاط کے طور پر مزید ٹیسٹ کیے گئے۔ اب تک ان مصنوعات کے استعمال سے متعلق کسی شکایت یا نقصان کی اطلاع موصول نہیں ہوئی۔

کمپنی نے والدین کے ممکنہ خدشات کو تسلیم کرتے ہوئے یقین دہانی کرائی ہے کہ صارفین کی حفاظت ان کی اولین ترجیح ہے۔