بارسلونا میں ’تھیرین‘ اجتماع کے بعد ہنگامہ آرائی، پانچ افراد گرفتار

بارسلونا میں ہفتہ کی رات ’تھیرین‘ (Therian) نامی گروپ کے ایک اجتماع کے بعد ہونے والے ہنگاموں کے نتیجے میں پانچ افراد کو گرفتار کر لیا گیا۔ پولیس اور بلدیاتی ذرائع کے مطابق اجتماع کے اختتام پر کچھ افراد نے تصادم، توڑ پھوڑ اور شہری املاک کو نقصان پہنچایا، جس کے بعد گواردیا اربانا پولیس اور موسس پولیس کو مداخلت کرنی پڑی۔

سوشل میڈیا کے ذریعے اس رجحان سے وابستہ نوجوانوں نے بارسلونا کے مشہور مقام Arc de Triomf پر جمع ہونے کی اپیل کی تھی۔ ’تھیرین‘ وہ نوجوان ہوتے ہیں جو خود کو کسی جانور سے مشابہ سمجھتے ہیں اور اکثر ماسک پہن کر جانوروں جیسا رویہ اختیار کرتے ہیں۔

اس اجتماع میں سینکڑوں نوجوان اور تماشائی شریک ہوئے اور ایک وقت میں شرکاء کی تعداد تقریباً 3,000 تک پہنچ گئی۔ ابتدا میں اجتماع پُرامن رہا، تاہم بعد میں کچھ افراد نے ہنگامہ آرائی شروع کر دی جس سے صورت حال خراب ہو گئی۔

صورتحال کو قابو میں لانے کے لیے بارسلونا کی شہری پولیس نے کاتالونیا کی علاقائی پولیس سے مدد طلب کی۔ کارروائی کے دوران پانچ افراد کو گرفتار کیا گیا، جن میں سے چار کو موسوس دی اسکوادرا جبکہ ایک کو گواردیا اربانا پولیس نے حراست میں لیا۔