مشرقِ وسطیٰ جنگ کے اثرات: کاتالونیا کا 400 ملین یورو امدادی پیکج، مزید اضافے کا عندیہ

بارسلونا: کاتالونیا کے صدر سلوادور اییا نے مشرقِ وسطیٰ میں جاری جنگ کے معاشی اثرات سے نمٹنے کے لیے 400 ملین یورو تک کے ابتدائی امدادی پیکج کا اعلان کیا ہے۔ انہوں نے کہا کہ یہ پیکج حالات کے مطابق مزید بڑھایا بھی جا سکتا ہے۔

صدر اییا کے مطابق اس منصوبے میں تقریباً 40 مختلف اقدامات شامل ہوں گے، جن میں براہِ راست مالی امداد، ٹیکس میں رعایتیں اور قرض و فنانسنگ کی سہولیات شامل ہیں۔ اس کا مقصد ان کاروباری شعبوں کو سہارا دینا ہے جو جنگ کے باعث سب سے زیادہ متاثر ہوئے ہیں، خصوصاً ٹرانسپورٹ، زراعت اور ماہی گیری کے شعبے۔

انہوں نے واضح کیا کہ اس پیکج کا ایک اہم ہدف عام شہریوں اور مزدور طبقے کی قوتِ خرید کو برقرار رکھنا ہے، کیونکہ توانائی اور بنیادی اشیاء کی قیمتوں میں اضافہ ہو رہا ہے۔ اس کے ساتھ ساتھ کمزور اور کم آمدنی والے خاندانوں کے لیے خصوصی اقدامات بھی کیے جائیں گے تاکہ وہ خوراک اور توانائی جیسے ضروری اخراجات پورے کر سکیں۔

سلوادور اییا نے یہ بھی اعلان کیا کہ امداد صرف ان کمپنیوں کو دی جائے گی جو اپنے ملازمین کو برطرف نہیں کریں گی، تاکہ روزگار کا تحفظ یقینی بنایا جا سکے۔

انہوں نے اس اقدام کو ہسپانوی حکومت اور یورپی یونین کے ساتھ مشترکہ حکمت عملی کا حصہ قرار دیتے ہوئے اتحاد اور تعاون پر زور دیا۔ ان کا کہنا تھا کہ موجودہ صورتحال میں تمام سیاسی اور معاشی قوتوں کو ذمہ داری کا مظاہرہ کرنا چاہیے اور بحران کو سیاسی فائدے کے لیے استعمال نہیں کرنا چاہیے۔

انہوں نے بڑی کمپنیوں اور مالیاتی اداروں پر بھی زور دیا کہ وہ غیر معمولی منافع خوری سے گریز کریں اور معاشی استحکام میں اپنا کردار ادا کریں۔