میڈرڈ میں شکیرا کے کنسرٹس پر تنازع، علاقائی حکومت کی مکمل سکیورٹی کے ساتھ انعقاد کی یقین دہانی

میڈرڈ کی علاقائی حکومت نے عالمی شہرت یافتہ کولمبیا گلوکارہ شکیرا کے آئندہ ستمبر میں ہونے والے کنسرٹس کے انعقاد کی ضمانت دے دی ہے، جبکہ اس معاملے پر مرکزی حکومت کے نمائندے کے ساتھ اختلافات شدت اختیار کر گئے ہیں۔

علاقائی وزیر برائے ہاؤسنگ، ٹرانسپورٹ اور انفراسٹرکچر Jorge Rodrigo نے کہا ہے کہ ویللاورڈے میں قائم Iberdrola Music میں شیڈول کے مطابق تمام کنسرٹس منعقد ہوں گے اور اس حوالے سے سکیورٹی کے مکمل انتظامات کیے جائیں گے۔ ان کا کہنا تھا کہ یہ مقام تمام قانونی تقاضے پورے کرتا ہے اور بڑے عوامی اجتماعات کے لیے موزوں ہے۔

یہ بیان اس خط کے بعد سامنے آیا ہے جو میڈرڈ میں مرکزی حکومت کے مندوب فرانسسکو مارتن نے میئر کو ارسال کیا تھا۔ خط میں کہا گیا تھا کہ جب تک سکیورٹی کے تمام پہلوؤں کی مکمل ضمانت نہیں دی جاتی، ان کنسرٹس پر نظرثانی کی جائے۔

جارجے رودریگو نے سخت ردعمل دیتے ہوئے الزام عائد کیا کہ حکومتی مندوب علاقائی حکومت کی ہر نئی پیش رفت میں رکاوٹ ڈالنے کی کوشش کرتے ہیں۔ ان کے مطابق اصل مسئلہ کنسرٹس یا مقام نہیں بلکہ غیر ضروری مداخلت ہے جو ترقیاتی اقدامات کو متاثر کرتی ہے۔

انہوں نے مزید کہا کہ سکیورٹی کے بعض معاملات خود مرکزی حکومت کے دائرہ اختیار میں آتے ہیں، اس لیے تعاون کے بجائے تنقید کرنا مناسب نہیں۔ ان کا کہنا تھا کہ عوامی مفاد کے منصوبوں میں ہم آہنگی ضروری ہے، نہ کہ سیاسی کشمکش۔

دوسری جانب اس معاملے نے سیاسی رنگ اختیار کر لیا ہے، جہاں ایک طرف علاقائی حکومت کنسرٹس کے انعقاد پر پُرعزم ہے، وہیں مرکزی نمائندہ سکیورٹی خدشات کو بنیاد بنا کر احتیاط کا مطالبہ کر رہا ہے۔