زیورات اور رئیل اسٹیٹ ایجنسیوں پر لوٹ مار کرنے والے پانچ افراد گرفتار

بارسلونا(دوست نیوز)موسوس دی اسکوادرا اور نیشنل پولیس نے ایک مجرمانہ گروہ کو توڑ دیا ہے جو پورے کاتالونیا میں زیورات کی دکانوں اور رئیل اسٹیٹ ایجنسیوں کی تجوریوں کی چوری میں مہارت رکھتا تھا۔ پانچ افراد کو گرفتار کیا گیا ہے، جن کا مجرمانہ ریکارڈ 150 سے زیادہ مقدمات پر مشتمل ہے۔ یہ افراد 17 ڈکیتی کی وارداتوں میں ملوث تھے، جن کی مالیت 7 لاکھ یورو تھی، اور ان میں سے تین چوریاں بارسلونا میں کی گئیں۔

تحقیقات کا آغاز 31 جنوری 2024 کو بارسلونا کی ایک زیورات کی دکان میں ہونے والی چوری کے بعد ہوا، جہاں سے 2,84,000 یورو مالیت کے زیورات چوری کیے گئے تھے۔ دیگر چوریاں بادالونا، تاراگونا، پلاموس، کامبریلس، روبی، اسپلوگس دے لوبریگات، پلاچا دی آرو اور سانت انتونی دی کالونج میں ہوئیں۔

چوری کرنے کا منفرد طریقہ

اس گروہ کا طریقہ واردات نہایت منفرد تھا۔ وہ چوری سے 15 دن سے ایک مہینے قبل دکان کا جائزہ لینے کے لیے عام گاہکوں کی طرح آتے اور نگرانی کرتے۔ اس دوران وہ کیمروں، سیکیورٹی سسٹمز اور دیگر حفاظتی اقدامات کا بغور جائزہ لیتے۔

چوری کی رات، وہ پہلے دکان میں داخل ہو کر الارم بجا دیتے تاکہ پولیس کو بلایا جا سکے۔ جب پولیس موقع پر پہنچ کر علاقے کا معائنہ کرنے کے بعد واپس چلی جاتی، تو یہ دوبارہ دکان میں گھس کر سیکیورٹی سسٹمز کو ناکارہ بنا دیتے۔ پھر یہ گروہ آکسیجن کٹنگ (Oxy-fuel cutting) کے ذریعے تجوریاں کھولتا، جو ایک پیچیدہ عمل تھا اور اس میں پانچ گھنٹے سے زیادہ وقت لگ سکتا تھا۔

تین افراد جیل میں، دو ضمانت پر رہا

تحقیقات اب بھی جاری ہیں اور مزید گرفتاریاں خارج از امکان نہیں۔ ملزمان پر مجرمانہ گروہ کا حصہ ہونے،ڈکیتی، منی لانڈرنگ، گاڑی چوری، اور جعلی دستاویزات کے الزامات عائد کیے گئے ہیں۔

بارسلونا کی عدالت نمبر 27 نے اس کیس کی ذمہ داری سنبھالی ہے۔ تین ملزمان کو بغیر ضمانت کے جیل بھیج دیا گیا ہے، جبکہ دو دیگر افراد کو ہفتہ وار عدالت میں پیش ہونے اور پاسپورٹ ضبط کرنے کی شرط پر رہا کر دیا گیا ہے۔