62 سالہ جرمن شہری ہائیکنگ کے دوران حادثاتی طور پر گر کر ہلاک

کینری جزائر(دوست نیوز)ایک 62 سالہ جرمن شہری ہفتے کے روز لا گومرا کے ویلےہرموسو میں واقع “پیکو دے لا کروز” پہاڑ پر ہائیکنگ کے دوران حادثاتی طور پر گر کر جاں بحق ہو گیا۔

دوپہر 2:09 بجے (14:09) کینری جزائر کے ایمرجنسی سروس سینٹر 112 کو حادثے کی اطلاع ملی، جس کے بعد ریسکیو ٹیموں کو فوری طور پر متحرک کیا گیا۔

کینری جزائر کی حکومت کے ہنگامی اور ریسکیو گروپ کے امدادی کارکنوں نے ہیلی کاپٹر کے ذریعے جائے وقوعہ پر پہنچ کر متاثرہ شخص کو ریسکیو کیا اور اسے اس مقام پر منتقل کیا جہاں کینری ایمرجنسی میڈیکل سروس کے طبی عملے نے اس کا معائنہ کیا اور اس کی موت کی تصدیق کی۔

ذرائع کے مطابق، 112 نے بتایا کہ ہسپانوی گاردیا سیول (Guardia Civil) نے لاش کی حفاظت اور ضروری قانونی کارروائی کی ذمہ داری سنبھالی۔