بارسلونیتا کے ساحل پر جنسی زیادتی: چار افراد گرفتار

بارسلونا(دوست نیوز)بارسلونا کی شہری پولیس (Guàrdia Urbana) نے چار مردوں کو، جن کی عمریں 21 سے 34 سال کے درمیان ہیں، بارسلونیٹا کے ساحل پر ایک خاتون کے ساتھ جنسی زیادتی کے الزام میں گرفتار کر لیا ہے۔ یہ واقعہ ہفتے کی صبح تقریباً ساڑھے تین بجے پیش آیا۔

پولیس کے مطابق، ہنگامی امداد اور گشت کے یونٹ کو ایک شہری نے اطلاع دی کہ کچھ مرد ایک خاتون پر حملہ کر رہے تھے۔ جب پولیس موقع پر پہنچی تو انہوں نے دیکھا کہ ان میں سے ایک شخص اس وقت زیادتی کر رہا تھا۔

بارسلونا پولیس نے مزید بتایا کہ متاثرہ خاتون پر ایسی کسی مفلوج کرنے والی دوا کے اثرات ظاہر ہو رہے تھے، جس کا مطلب یہ ہو سکتا ہے کہ اسے نشہ آور چیز دے کر بے بس کر دیا گیا تھا۔

کاتالان پولیس (Mossos d’Esquadra) نے معاملے کی تحقیقات شروع کر دی ہیں۔ ابھی تک پولیس اس بات کی تصدیق نہیں کر سکی کہ یہ اجتماعی زیادتی تھی یا انفرادی حملہ، تاہم وہ کسی امکان کو مسترد بھی نہیں کر رہے۔ طبی عملہ متاثرہ خاتون کو طبی امداد دے رہا ہے، لیکن اس کی باضابطہ گواہی ابھی تک نہیں لی جا سکی۔ میڈیکل رپورٹ کا انتظار بھی باقی ہے۔

یہ 2025 میں بارسلونا میں پیش آنے والا جنسی زیادتی کا دوسرا واقعہ ہے۔ پہلا واقعہ 17 جنوری کو رپورٹ ہوا تھا، جب Mossos d’Esquadra نے Les Corts کے علاقے میں ایک گھر میں اجتماعی زیادتی کے الزام میں تین افراد کو گرفتار کیا تھا۔ ان کی عمریں 18 سے 22 سال کے درمیان تھیں، اور عدالت نے انہیں بغیر ضمانت جیل بھیجنے کا حکم دیا تھا۔