ایسپانیول-بارسلونا ڈربی میچ،کار حادثہ کا ایک زخمی آئی سی یو میں داخل

بارسلونا(دوست نیوز)کاتالونیا کے محکمہ صحت نے رپورٹ کیا ہے کہ جمعرات کی رات ایسپانیول-بارسلونا ڈربی میچ سے قبل ایک کار کے لوگوں پر چڑھ دوڑنے کے واقعے میں ایک شخص انتہائی نگہداشت کے یونٹ (ICU) میں داخل ہے۔

یہ واقعہ میچ شروع ہونے سے قبل، کورنییا میں واقع آر سی ڈی ای اسٹیڈیم کے قریب پیش آیا، جہاں کاتالان ڈربی ہونے والا تھا۔

محکمہ صحت کے مطابق 17 افراد زخمی ہوئے، جن میں سے ایک خود چل کر قریبی طبی مرکز پہنچا، جب کہ باقی 16 کو کاتالان میڈیکل ایمرجنسی یونٹ (SEM) نے طبی امداد فراہم کی۔

چار زخمی اب بھی مختلف اسپتالوں میں زیر علاج ہیں، اور ان میں سے ایک کی حالت تشویشناک ہے جو آئی سی یو میں ہے۔

واقعے کی ویڈیوز سوشل میڈیا پر شیئر کی گئی ہیں۔ایک سفید کار لوگوں کے ہجوم کے درمیان رک گئی، جہاں موجود لوگ اس کے سواروں پر چِلا رہے تھے اور اس پر چیزیں پھینک رہے تھے، اس کے بعد اچانک گاڑی نے تیز رفتاری سے ہجوم میں گھس کر متعدد افراد کو اپنی زد میں لے لیا۔

کاتالان پولیس کے مطابق ڈرائیور نے گاڑی پر قابو کھو دیا تھا اور زخمیوں کی حالت نسبتاً معمولی تھی۔پہلے تو پولیس نے اس واقعے کو حادثاتی قرار دیا، لیکن پولیس کمشنر ایڈورڈ سالینٹ نے کہا کہ ڈرائیور کو مبینہ طور پر فٹبال شائقین کی طرف سے “ہراساں” کیے جانے کا احساس ہوا، جس پر اُس نے یہ قدم اٹھایا۔

کچھ شائقین نے غصے کا اظہار کیا کہ اتنے سنگین واقعے کے باوجود میچ کھیلا گیا۔

کرستیان گارشیا نے سوال اٹھایا: “کون سمجھتا ہے کہ ان حالات میں میچ ہونا نارمل ہے؟” انہوں نے کہا کہ جب انہوں نے سنا کہ کار لوگوں پر چڑھ دوڑی ہے، تو انہیں لگا شاید دہشت گرد حملہ ہوا ہے۔

ایسپانیول کے ایک اور مداح، الیخاندرو گارشیا، خاص طور پر اپنے کلب کی انتظامیہ پر برہم تھے۔انہوں نے بتایا کہ ان کے ایک دوست کی ٹانگ ٹوٹ گئی۔

انہوں نے کہا: “میچ کیسے کھیلا گیا؟ اور بورڈ کیا کر رہا ہے؟ کچھ نہیں۔ یہ کلب اور اس کی انتظامیہ کے لیے شرم کی بات ہے۔”

ہیوگو مولیرو نے کاتالان نیوز ایجنسی کو بتایا کہ انہوں نے اپنی آنکھوں سے دیکھا کہ “گاڑی نے تیز ہونا شروع کیا اور سامنے کھڑے لوگوں کو اپنی لپیٹ میں لے لیا۔”