پیرس فیشن ویک میں جرمن برانڈ کا فلسطینیوں سے اظہارِ یکجہتی
حال ہی میں اختتام پذیر ہونے والے پیرس فیشن ویک میں جرمنی کے ایک مشہور برانڈ نے اپنی نئی کلیکشن کی نمائش کے دوران فلسطینیوں سے اظہارِ یکجہتی کیا۔
پیرس فیشن ویک میں سرہت عشق اور بنجمن ہسبی کے قائم کردہ جدید جرمن فیشن برانڈ کی موسم سرما و موسم خزاں 2024ء کی نئی فیشن کلیکشن کی نمائش نے شرکاء کی خصوصی توجہ حاصل کی کیونکہ اس برانڈ نے اپنی نئی کلیکشن کی نمائش کے دوران عالمی سطح پر موجود چیلنجز کی زبردست انداز میں نشاندہی کی۔
سرہت عشق اور بنجمن ہسبی نے پیرس فیشن ویک جیسے عالمی پلیٹ فارم کا سماجی تبدیلی کیلئے بھرپور انداز میں استعمال کرتے ہوئے غزہ میں جنگ بندی کرنے اور اسرائیلی قبضے کا خاتمہ کرکے ایک آزاد ریاست فلسطین کے قیام کا مطالبہ کیا۔
اُنہوں نے اپنے مطالبات پر زور دیتے ہوئے کہا کہ یہ ایسے مطالبات ہیں جو غیر متنازعہ ہونے چاہئیں۔
GmbH نامی اس جرمن فیشن برانڈ نے نہتے فلسطینیوں سے یکجہتی کا اظہار کرنے کے لیے اپنی نئی موسم سرما و موسم خزاں 2024ء کی کلیکشن کے لیے ڈیزائین کے گیے کپڑوں میں فلسطینی مزاحمت کی علامت بننے والے اسکارف ’کوفیہ‘ کے ڈیزائن کو بھی شامل کیا۔
سرہت عشق اور بنجمن ہسبی نے برطانوی میڈیا سے گفتگو کرتے ہوئے کہا کہ فیشن انڈسٹری میں موجود ان کے ساتھی غزہ پر اسرائیلی جنگ کے بارے میں بات کرنے سے خوفزدہ ہیں۔
اُنہوں نے بتایا کہ ہم جانتے ہیں کہ پردے کے پیچھے ہمارے بہت سے اتحادی ہیں لیکن پھر بھی ہر کوئی کاروبار اور روزی روٹی کمانے کے ذرائع چھن جانے کے ڈر سے خوفزدہ ہوکر خاموش ہے اور ایسی صورتحال میں مزاحمت کے سوا اور کوئی چارہ نہیں ہے۔
