ووکس کی کانگریس میں قرارداد: غیر قانونی تارکین وطن کی ملک بدری، کم عمر افراد کی واپسی اور “اوپن آرمز” کشتی ضبط کرنے کا مطالبہ

میڈرڈ (دوست نیوز)ووکس پارٹی آئندہ ہفتے کانگریس میں ایک قرارداد پیش کرے گی جس میں حکومت سے مطالبہ کیا گیا ہے کہ غیر قانونی تارکین وطن کو فوری طور پر ملک بدر کیا جائے، تنہا کم عمر مہاجرین کو ان کے وطن واپس بھیجا جائے اور سمندری امدادی تنظیم “اوپن آرمز” کی کشتی ضبط کر لی جائے۔

یہ قرارداد وکس کی رکنِ پارلیمان روثیو دے میر کی اس فوری سوال و جواب کی توسیع ہے جو انہوں نے وزیرِ داخلہ فرناندو گراندے مارلاسکا سے حکومت کی پالیسیوں پر کیا تھا۔ ووکس کا کہنا ہے کہ اسپین “مہاجرین کی یلغار” کا شکار ہے اور موجودہ حکومت کی “اوپن بارڈر اور غیر قانونی ہجرت کی حوصلہ افزائی” جیسی پالیسیوں نے صورتحال کو سنگین بنا دیا ہے۔

قرارداد میں مطالبہ کیا گیا ہے کہ تمام غیر قانونی تارکین وطن کو فوراً ملک بدر کیا جائے اور تنہا کم عمر مہاجرین کو ان کے خاندانوں سمیت وطن واپس بھیجا جائے۔ اسی طرح، اوپن آرمز جیسی این جی اوز کے جہازوں کی “غیر قانونی انسانی اسمگلنگ میں مبینہ شمولیت” پر ان کی ضبطی کا مطالبہ کیا گیا ہے۔

مزید یہ کہ، وکس چاہتی ہے کہ ایسی تمام تنظیموں کی مالی معاونت ختم کی جائے جو کسی بھی صورت میں غیر قانونی ہجرت کو سہارا دیتی ہیں۔ قرارداد میں انسانی اسمگلنگ سے منسلک مافیا کے خلاف سخت اقدامات اور ان کی معاون تنظیموں پر کڑی کارروائی کی اپیل بھی کی گئی ہے۔

پارٹی نے زور دیا ہے کہ سرحدی کنٹرول مزید سخت کیے جائیں، سکیورٹی فورسز اور فوج کو اس مقصد کے لیے اضافی وسائل فراہم کیے جائیں اور غیر قانونی ہجرت کی راہداریوں کو “پہچان کر مسدود” کیا جائے۔

اسی طرح، افریقی ممالک کو ترجیح دیتے ہوئے دو طرفہ معاہدے کرنے کا مطالبہ کیا گیا ہے تاکہ غیر قانونی ہجرت کی روک تھام ہو سکے اور اسپین پہنچنے والے تمام بالغ اور کم عمر مہاجرین کو فوری طور پر واپس بھیجا جا سکے۔

ووکس نے اس بات پر بھی زور دیا ہے کہ اسپین کے امیگریشن قوانین اور ضوابط میں سختی کی جائے تاکہ بڑے پیمانے پر ہونے والی غیر قانونی مہاجرین کی ریگولرائزیشن کو روکا جا سکے۔ مزید برآں، سیاسی پناہ اور ثانوی تحفظ سے متعلق قوانین میں تبدیلی کی تجویز بھی دی گئی ہے تاکہ “جعلی درخواستوں” کو روکا جا سکے۔

کانگریس اگلے ہفتے وکس کی اس تجویز پر بھی رائے شماری کرے گی جس کے مطابق غیر قانونی تارکین وطن کی “ارائیگو” (قیام یا خاندانی بنیاد پر رہائش) کے ذریعے قانونی حیثیت حاصل کرنے کی سہولت محدود کر دی جائے۔ پارٹی کے مطابق، موجودہ قوانین بہت “نرم” ہیں اور یہی “غیر قانونی ہجرت کے لیے غلط ترغیب” ثابت ہوتے ہیں۔