ووکس کے نئے ووٹر کون ہیں؟ عمر، جنس اور سماجی طبقے کے اعتبار سے ڈیٹا

میڈرڈ (14 ستمبر 2025) — تازہ ترین سروے ووکس کو تقریباً 17 فیصد حمایت دیتے ہیں، جو 2023 کے مقابلے میں پانچ پوائنٹس زیادہ ہے۔ پارٹی کی مقبولیت مختلف طبقوں میں بڑھ رہی ہے، لیکن خاص طور پر نوجوان مردوں اور عورتوں میں نمایاں اضافہ دیکھا گیا ہے۔

مرد اور خواتین

ووکس کا ووٹ بینک اب بھی زیادہ تر مردوں پر مشتمل ہے۔ 2023 میں 15 فیصد مرد اور 10 فیصد خواتین نے اس جماعت کو ووٹ دیا تھا۔ 2025 میں یہ شرح بڑھ کر مردوں میں 21 فیصد اور خواتین میں 13 فیصد تک پہنچ گئی ہے۔ یوں ہر سات میں سے ایک عورت ووکس کو ووٹ دینے کا سوچ رہی ہے۔

عمر کے لحاظ سے ووٹ

اعداد و شمار کے مطابق ووکس کو سب سے زیادہ حمایت نوجوانوں میں مل رہی ہے۔ 35 سال سے کم عمر ووٹروں میں تقریباً 30 فیصد اس جماعت کو ووٹ دینا چاہتے ہیں، جب کہ 50 سال والوں میں یہ شرح 16 فیصد اور 65 سال سے زائد عمر والوں میں صرف 10 فیصد ہے۔ خاص طور پر 18 سے 24 سال کے نوجوان مردوں میں حمایت 40 فیصد تک جا پہنچی ہے، جب کہ اسی عمر کی خواتین میں بھی حمایت 7 فیصد سے بڑھ کر 20 فیصد ہو گئی ہے۔

ووٹرز کی سابقہ وابستگی

ووکس کے موجودہ 62 فیصد ووٹر وہی ہیں جنہوں نے 2023 میں بھی اس جماعت کو ووٹ دیا تھا۔ اس کے علاوہ تقریباً 8 لاکھ 40 ہزار سابقہ پی پی ووٹرز (20 فیصد) اور ڈھائی لاکھ کے قریب پی ایس او ای ووٹرز (6 فیصد) اب وکس کی طرف منتقل ہوئے ہیں۔

اہم مسائل

ووکس کے ووٹرز کے نزدیک سب سے بڑا مسئلہ مہاجرین ہیں۔ 47 فیصد حامی اسے ملک کے تین بڑے مسائل میں شامل کرتے ہیں، جب کہ مجموعی طور پر یہ فکر صرف 21 فیصد ہسپانوی آبادی میں پائی جاتی ہے۔ دوسرے نمبر پر حکومت اور سیاستدانوں سے نفرت یا مایوسی ہے، جسے تقریباً نصف ووٹر ایک بڑا مسئلہ سمجھتے ہیں۔

پیشہ اور سماجی طبقہ

پیشہ وارانہ لحاظ سے وکس کو سب سے زیادہ حمایت طلبہ میں مل رہی ہے (27 فیصد)، جب کہ کام کرنے والے طبقے میں بھی حمایت 13 سے بڑھ کر 20 فیصد ہو گئی ہے۔ برعکس اس کے، پنشنرز میں حمایت 10 فیصد کے آس پاس محدود ہے۔ سماجی طبقوں میں یہ اضافہ تقریباً ہر سطح پر دیکھا گیا ہے، تاہم سب سے زیادہ اضافہ درمیانے اور درمیانے سے اوپر طبقے میں ہوا ہے۔

خلاصہ

اعداد و شمار واضح کرتے ہیں کہ وکس کا ووٹ بینک مختلف طبقوں میں پھیل رہا ہے، مگر اس کا نمایاں سہارا نوجوان مرد اور خواتین، خاص طور پر 18 سے 35 سال کے درمیان ہیں۔ پارٹی کی مقبولیت کا مرکز دو بڑے موضوعات ہیں: مہاجرت مخالف رویہ اور موجودہ حکومت و سیاستدانوں کے خلاف سخت موقف۔