اسپین میں شرحِ پیدائش بدستور کم، سات ماہ میں 1 لاکھ 82 ہزار 818 بچوں کی ولادت

میڈرڈ (دوست نیوز) اسپین میں شرحِ پیدائش بدستور کم سطح پر ہے، اگرچہ رواں سال کے پہلے سات ماہ (جنوری تا جولائی 2025) کے دوران 1 لاکھ 82 ہزار 818 بچوں کی ولادت ہوئی۔ یہ گزشتہ سال کے اسی عرصے کے مقابلے میں 687 زیادہ ہیں، تاہم اب بھی 2015 کے مقابلے میں 58 ہزار 500 کم ہیں۔

انسٹی ٹیوٹ نیشنل ڈی اسٹیٹسٹیکا (INE) کے مطابق جولائی 2025 میں 27 ہزار 475 بچے پیدا ہوئے، جو کہ پچھلے سال کے اسی ماہ سے صرف 30 زیادہ ہیں۔

اعداد و شمار سے ظاہر ہوتا ہے کہ اسپین میں 40 سال سے زائد عمر کی ماؤں کے ہاں پیدا ہونے والے بچوں (2,914) کی تعداد 25 سال سے کم عمر ماؤں کے بچوں (2,552) سے زیادہ ہے۔ تاہم سب سے زیادہ پیدائشیں 30 تا 34 سال (8,977) اور 35 تا 40 سال (8,181) کی ماؤں میں ریکارڈ کی گئیں۔

علاقائی اعتبار سے، بالیاریز، کانتابریا، ایکسٹرامادورا، ناوارا، مُرسیہ، کاسٹیلا و لیون، اندلس اور گلیسیا میں پیدائشوں میں کمی دیکھی گئی۔ اس کے برعکس، کمیونٹی آف میڈرڈ سب سے آگے رہی جہاں شرح پیدائش میں 2.74 فیصد اضافہ ہوا، اس کے بعد لا ریوخا (2.52%)، آستوریاس (2.05%)، باسک ملک (1.73%)، کاسٹیلا لا مانچا (1.57%)، کینری آئلینڈز (1.53%)، کمیونٹی والنسیا (0.74%) اور کاتالونیا (0.15%) کا نمبر آتا ہے۔

رپورٹ کے مطابق، اسی عرصے میں اموات کی تعداد 2 لاکھ 63 ہزار 749 رہی، جو گزشتہ سال کے مقابلے میں 2,665 زیادہ ہیں۔