اسپین میں کرایہ پر رہنے والے افراد کے حقوق سے متعلق نئے شاہی فرمان کے تحت مکان مالکان کو کرایہ نامہ تجدید نہ کرنے کی صورت میں کم از کم چھ ماہ پہلے کرایہ دار کو اطلاع دینا ہوگی۔ یہ قانون 15 نومبر 2026 سے نافذ العمل ہوگا، جبکہ اس سے قبل نوٹس دینے کی مدت چار ماہ تھی۔
اسپین میں رہائش کے حق کے لیے احتجاجی دھرنوں کو ایک ماہ مکمل ہونے کے بعد مرکزی حکومت نے کرایہ داری کے قوانین میں اہم تبدیلیاں متعارف کرائی ہیں۔ ان احتجاجی مظاہروں کا آغاز 26 ستمبر کو میڈرڈ کے معروف علاقے پورتا دیل سول سے ہوا تھا۔ یہ احتجاج 87 سالہ ماریکامن اباسکال کی بے دخلی کے واقعے کے بعد شروع ہوئے، جنہیں ان کی رہائش گاہ سے نکال دیا گیا تھا۔ بعد ازاں انہیں اسپتال منتقل کیا گیا، جہاں وہ گھر واپس آنے سے پہلے انتقال کر گئیں۔
نئے ضابطے کے مطابق مکان مالک کو کرایہ نامہ ختم کرنے یا اس کی تجدید نہ کرنے کے لیے چھ ماہ پہلے نوٹس دینا ہوگا، جبکہ کرایہ دار کو مکان خالی کرنے یا معاہدہ آگے نہ بڑھانے کی اطلاع کم از کم دو ماہ پہلے دینا ہوگی۔
یہ ضابطہ مستقل رہائش کے لیے کرایہ پر دیے گئے مکانات کے ان معاہدوں پر لاگو ہوگا جن کی ابتدائی مدت یا توسیع مکمل ہونے والی ہو اور معاہدے کو کم از کم پانچ سال گزر چکے ہوں۔ اگر مکان کا مالک کوئی کمپنی یا قانونی ادارہ ہو تو یہ مدت سات سال ہوگی۔ مقررہ مدت میں نوٹس نہ دینے کی صورت میں معاہدہ مزید پانچ یا سات سال کے لیے لازمی طور پر بڑھایا جا سکے گا۔
نئے قانون میں بعض حالات میں کرایہ داروں کے لیے مالی معاوضے کی شق بھی شامل کی گئی ہے۔ معاوضے کا تعین سرکاری کرایہ قیمتوں کے نظام اور مکان میں رہائش کی مدت کی بنیاد پر ہوگا۔ رقم ان دو میں سے زیادہ ہوگی: سرکاری نظام کے مطابق کرایے کی بلند ترین مقررہ قیمت کے حساب سے 12 ماہ کا کرایہ، یا مکان میں گزارے گئے ہر سال کے بدلے ایک ماہ کا کرایہ۔ ایک سال سے کم مدت کا حساب تناسب سے ہوگا۔
تاہم بعض صورتوں میں معاوضہ نہیں ملے گا، مثلاً مالک کو قانونی شرائط کے تحت ذاتی یا خاندانی ضرورت کے لیے مکان درکار ہو، کرایہ دار بلاجواز گزشتہ چھ ماہ سے وہاں نہ رہ رہا ہو، یا اسی شہر میں اس کے پاس متبادل رہائش موجود ہو۔
یہ تبدیلیاں اسپین میں 29 نومبر کو ہونے والے عام انتخابات سے قبل رہائش کے مسئلے کو سیاسی بحث کا اہم موضوع بنا رہی ہیں۔
