بارسلونا/ بارسلونا سٹی کونسل نے کاتالونیا کی علاقائی حکومت کے ساتھ مل کر ایک نئی سرکاری کمپنی قائم کرنے کے معاہدے کی منظوری دے دی ہے، جس کا مقصد شہر کے علاقے بیسوس مارسمے (Besòs-Maresme) میں تقریباً 4 ہزار رہائشی مکانات کی بحالی اور شہری ترقی کے منصوبوں کو تیز کرنا ہے۔
اس منصوبے کے تحت آئندہ دس برسوں کے دوران مجموعی طور پر 415 ملین یورو (41 کروڑ 50 لاکھ یورو) کی سرمایہ کاری کی جائے گی۔ معاہدے کی حمایت سوشلسٹ پارٹی (PSC)، جنتس (Junts)، بارسلونا این کومو (BComú) اور ریپبلکن لیفٹ (ERC) نے کی، جبکہ پاپولر پارٹی (PP) اور ووکس (Vox) نے ووٹنگ میں غیر جانب دار رہنے کا فیصلہ کیا۔
نئی سرکاری کمپنی کا نام Impulsem Futur Besòs-Maresme SA رکھا گیا ہے، جو علاقے میں مکانات کی مرمت، عمارتوں کی بہتری اور شہری ترقی کے منصوبوں پر عمل درآمد کی ذمہ دار ہوگی۔
مالی منصوبے کے مطابق کاتالونیا کی حکومت دس برسوں میں 150 ملین یورو فراہم کرے گی، جبکہ بارسلونا سٹی کونسل 265 ملین یورو خرچ کرے گی۔ منصوبے کے پہلے مرحلے میں 2029 تک تقریباً 95 ملین یورو استعمال کیے جانے کی توقع ہے۔
بارسلونا کی ڈپٹی میئر لایا بونیت نے کہا کہ اس اقدام سے مکانات کی بحالی کے کاموں میں تیزی آئے گی۔ ان کے مطابق گزشتہ چار برسوں میں صرف 192 مکانات کی مرمت ممکن ہوسکی ہے۔ اگر کام اسی رفتار سے جاری رہا تو تمام منصوبہ مکمل کرنے میں چار دہائیوں سے زیادہ وقت لگ سکتا ہے۔
جنتس کے نمائندے دامیّا کالویت نے رہائشیوں کے ساتھ بہتر رابطوں اور مشاورت کی ضرورت پر زور دیا۔ بارسلونا این کومو کی نمائندہ تانیا کورونس نے مطالبہ کیا کہ نئی کمپنی اس بات کو یقینی بنائے کہ موجودہ رہائشی اپنے گھروں میں رہ سکیں اور عمارتیں گرانے کے بجائے ان کی مرمت کو ترجیح دی جائے۔
ای آر سی کی نمائندہ ایوا بارو نے بھی منصوبے کی حمایت کرتے ہوئے کام جلد شروع کرنے کا مطالبہ کیا۔
دوسری جانب پاپولر پارٹی کے وکتر مارتی نے منصوبے میں تاخیر اور طویل مدت پر تنقید کی، جبکہ ووکس کے نمائندے لیبرتو سیندروس نے ابتدائی سرمایہ کاری کی تفصیلات اور اخراجات کے طریقہ کار پر سوالات اٹھائے۔
اس معاہدے کی منظوری کے بعد بارسلونا سٹی کونسل اور کاتالونیا حکومت نے نئی کمپنی کے قیام اور علاقے میں ہزاروں گھروں کی بحالی کے ایک بڑے منصوبے کی جانب پہلا عملی قدم اٹھا لیا ہے۔
