بارسلونا/اسپین کے نئے وزیرِ ٹرانسپورٹ کارلوس کیورپو نے بارسلونا اور میڈرڈ کے درمیان تیز رفتار ٹرین سروس (AVE) بند کرنے کے کسی بھی امکان کو مسترد کردیا ہے۔ ان کا کہنا ہے کہ حکومت کا مقصد ریلوے نظام کی حفاظت کو یقینی بنانا اور حالیہ حادثات کے بعد مسافروں کا اعتماد بحال کرنا ہے۔
کارلوس کیورپو نے رواں ہفتے سابق وزیر ٹرانسپورٹ آسکر پوینتے کے استعفے کے بعد یہ عہدہ سنبھالا ہے۔ ان کے پیش رو نے حفاظتی خدشات کے پیش نظر بارسلونا اور میڈرڈ کے درمیان ٹرین سروس عارضی طور پر بند کرنے کا امکان ظاہر کیا تھا۔
تاہم نئے وزیر نے ٹی وی چینل ’لا سیپتیما‘ کو انٹرویو دیتے ہوئے واضح کیا کہ ٹرین لائن بند کرنے کا کوئی منصوبہ زیرِ غور نہیں۔ انہوں نے کہا کہ وہ اس معاملے پر تمام ابہام دور کرنا چاہتے ہیں۔
کارلوس کیورپو کے مطابق یوردا (Urda) میں پیش آنے والے جان لیوا ٹرین حادثے کے بعد حکومت کی اولین ترجیح ریلوے نظام کو محفوظ بنانا اور عوام کا اعتماد دوبارہ حاصل کرنا ہے۔ اس مقصد کے لیے ٹرین ڈرائیوروں، ریلوے آپریٹر ادارے ایدیف (Adif) کے عملے اور ٹکٹ چیک کرنے والے ملازمین کی تجاویز کو بھی اہمیت دی جا رہی ہے۔
وزیر نے بتایا کہ 29 نومبر کو ہونے والے انتخابات سے قبل ریلوے نظام میں اہم اصلاحات متعارف کرانے کی گنجائش موجود ہے۔ ان اصلاحات میں ٹرینوں کی رفتار کم کرنے کی تجویز بھی شامل ہے۔
انہوں نے کہا کہ اس وقت ٹرین کے سفر میں دس منٹ زیادہ لگنا یا کم لگنا اہم نہیں، بلکہ اصل مقصد مسافروں کا اعتماد بحال کرنا ہے۔
کارلوس کیورپو نے مزید بتایا کہ ایدیف کو آئندہ پانچ برسوں میں ریلوے لائنوں کی دیکھ بھال اور مرمت کے لیے اضافی مالی وسائل فراہم کیے گئے ہیں۔ اس مد میں سرمایہ کاری حالیہ برسوں کے مقابلے میں 50 فیصد بڑھائی گئی ہے۔
انہوں نے یہ بھی کہا کہ اگر حفاظتی اقدامات کے نتیجے میں کسی ٹرین لائن کو بند کرنا پڑا اور اس کے معاشی اثرات سامنے آئے تو ان نقصانات کو کم سے کم رکھنے کی کوشش کی جائے گی، تاہم حفاظت پر کوئی سمجھوتہ نہیں ہوگا۔
دوسری جانب نئے وزیر نے جمعرات کو ٹرین ڈرائیوروں کی یونینوں سے ملاقات کی اور جمعہ کو ملازمین کے نمائندوں سے دوبارہ ملاقات طے ہے۔ ان مذاکرات کا مقصد مجوزہ ہڑتالوں کو ختم کرنے کے لیے اتفاقِ رائے پیدا کرنا ہے۔
