بارسلونا/ اسپین کی کاتالونیا پولیس موسوس دی اسکوادرا نے کرائے کے مکانوں اور کمروں کے جعلی اشتہارات کے ذریعے شہریوں کو لوٹنے کے الزام میں ایک 20 سالہ خاتون اور 31 سالہ مرد کو گرفتار کرلیا ہے۔ ملزمان پر 21 افراد کے ساتھ فراڈ اور چوری کی چھ وارداتوں میں ملوث ہونے کا شبہ ہے۔
پولیس کے مطابق دونوں گرفتاریاں 26 اکتوبر کو عمل میں آئیں۔ تحقیقات کا آغاز ستمبر میں مانریسا اور ویاس پولیس اسٹیشنوں میں دو شکایات موصول ہونے کے بعد کیا گیا تھا۔ اب تک 21 متاثرین کی نشاندہی ہوچکی ہے، جنہیں مجموعی طور پر 13 ہزار یورو سے زائد کا مالی نقصان پہنچایا گیا۔ پولیس کو خدشہ ہے کہ متاثرین کی تعداد مزید بڑھ سکتی ہے۔
تحقیقات کے مطابق خاتون مختلف آن لائن پلیٹ فارمز کے ذریعے سیاحوں کے لیے مختص اپارٹمنٹس ایک یا دو راتوں کے لیے کرائے پر لیتی تھی۔ وہاں قیام کے دوران وہ ایک پراپرٹی ویب سائٹ پر تقریباً 300 یورو ماہانہ کرائے کے مکانوں اور کمروں کے اشتہارات شائع کرتی تھی۔
دلچسپی ظاہر کرنے والے افراد کو خود مکان دکھاتی اور مالک مکان یا کرایہ دار ظاہر کرکے ان کا اعتماد حاصل کرتی تھی۔ معاہدے پر جعلی معلومات درج کرکے متاثرین سے پہلے مہینے کا کرایہ اور سیکیورٹی ڈپازٹ نقد وصول کرتی تھی۔ یہ رقم 450 سے 800 یورو کے درمیان ہوتی تھی۔
رقم وصول کرنے کے بعد کبھی چابیاں دے دیتی اور کبھی اگلے دن دینے کا وعدہ کرتی، لیکن متاثرہ شخص جب سامان لے کر وہاں پہنچتا تو خاتون غائب ہوچکی ہوتی، فون نمبر بلاک اور اشتہار حذف کردیا جاتا۔ بعض اوقات ایک ہی کمرہ ایک ہی دن میں کئی افراد کو کرائے پر دیا گیا۔
پولیس کے مطابق خاتون اپارٹمنٹس چھوڑتے وقت ٹیلی ویژن، مائیکروویو، بستر کی چادریں اور تولیے بھی چوری کرتی تھی۔ چھ سیاحتی اپارٹمنٹس سے چوری ہونے والے سامان کی مالیت 4,500 یورو سے زیادہ بتائی گئی ہے۔
یہ وارداتیں ویاس، تاراگونا، تیراسا، مانریسا، سبادیل، ویلادیکانس، کالافیل، بادالونا اور ایل ویندریل میں پیش آئیں۔
زیادہ تر متاثرین کی عمریں 18 سے 25 سال کے درمیان تھیں اور وہ کم آمدنی کے باعث فوری رہائش کی تلاش میں تھے۔ بعض افراد نے اپنا سامان نئے مکان میں منتقل کردیا اور پرانی رہائش بھی چھوڑ دی تھی۔ فراڈ سامنے آنے کے بعد کچھ افراد بے گھر ہوگئے، جبکہ ایک متاثرہ شخص کو سڑک پر رات گزارنا پڑی۔
گرفتار خاتون اس سے قبل بھی اسی نوعیت کے واقعات میں ملوث رہی ہے۔ اسے 29 اکتوبر کو مانریسا کی عدالت میں پیش کیا گیا۔
پولیس نے شہریوں کو مشورہ دیا ہے کہ مارکیٹ سے غیر معمولی طور پر کم کرائے کی پیشکشوں سے محتاط رہیں، مالک مکان کی شناخت اور جائیداد کی ملکیت رجسٹر آف پراپرٹی سے تصدیق کریں، شناختی کارڈ اور معاہدے کی معلومات چیک کریں اور تصدیق کے بغیر نقد رقم ادا نہ کریں۔
اگر کسی کے ساتھ اس طرح کا فراڈ ہوا ہے تو فوری طور پر موسوس ڈی اسکواڈرا کے کسی بھی پولیس اسٹیشن میں شکایت درج کروائیں۔
