بارسلونا میٹرو کی سب سے گہری اسٹیشن: یورپ کی منفرد زیرِ زمین تعمیر
Screenshot
بارسلونا — (29 ستمبر 2025)بارسلونا کے زیرِ زمین ٹرانسپورٹ نظام کو اس سال اپنی سو سالہ تاریخ مکمل ہونے پر یادگار تقریبات سے منایا جا رہا ہے۔ انہی مواقع میں میٹرو کی سب سے گہری اور انوکھی اسٹیشن “ایل کول – لا تیکسونرا” (El Coll – La Teixonera) کو نمایاں حیثیت حاصل ہے، جو لائن 5 پر واقع ہے اور سطح زمین سے 74 میٹر نیچے ہے۔ یہ نہ صرف بارسلونا میٹرو کا سب سے گہرا اسٹیشن ہے بلکہ یورپ کی گہری ترین اسٹیشنز میں بھی شمار ہوتا ہے۔
یہ اسٹیشن تین پہاڑی محلوں — ایل کول، لا تیکسونرا اور ال کارمل — کو آپس میں جوڑتا ہے، جہاں طویل عرصے تک ٹرانسپورٹ کی سہولت ناکافی رہی۔
قدرتی ڈھلوان کو مدنظر رکھتے ہوئے اس اسٹیشن کو مکمل طور پر عمودی انداز میں تعمیر کیا گیا ہے۔ یہاں جدید شیشے کے لفٹ، برقی سیڑھیاں اور چلنے والی پٹیاں موجود ہیں۔ اسٹیشن کے 18 منزلہ حصے اور 400 مربع میٹر سے زائد رقبے پر مشتمل ہال اسے انجینئرنگ کا شاندار نمونہ بناتے ہیں۔
اس اسٹیشن میں ایک 419 سیڑھیوں پر مشتمل زینہ بھی ہے، جو رواں برس 18 مئی کو “کرونو اِسکالادا” نامی دوڑ کا مرکز رہا۔ اس مقابلے میں شرکاء نے پلیٹ فارم سے سطح زمین تک تمام سیڑھیاں دوڑ کر طے کیں۔ یہ تقریب میٹرو کے صد سالہ جشن کا حصہ تھی، جس میں دیگر سرگرمیوں کے ساتھ تاریخی ٹرینوں کی نمائش، “اسٹیشن فینٹم” کے دورے اور عارضی فن پاروں کی نمائش بھی شامل ہے۔
اس اسٹیشن کا مطالبہ مقامی آبادی نے 1980 اور 1990 کی دہائی میں کیا تھا۔ باضابطہ تعمیر 2002 میں شروع ہوئی، لیکن جنوری 2005 میں ایک بڑا حادثہ پیش آیا، جب سرنگ کھدائی کے دوران زمین دھنسنے سے قریبی عمارتیں متاثر ہوئیں اور ایک ہزار سے زائد افراد کو انخلا کرنا پڑا۔ اس واقعے نے منصوبے کو دو برس سے زیادہ عرصے کے لیے روک دیا۔
آخرکار جولائی 2010 میں اس اسٹیشن کو ہورتا اور وال د ہیبرون کے درمیان توسیعی حصے کے ساتھ کھول دیا گیا۔ آج یہ نہ صرف مقامی شہریوں کے لیے بنیادی سہولت ہے بلکہ زیرِ زمین انجینئرنگ کا ایک نمایاں نمونہ بھی ہے۔
میٹرو کے صد سالہ جشن میں شہریوں کو بارسلونا کے اس منفرد نظام کے پوشیدہ راز جاننے اور اس کی تاریخی ترقی کو قریب سے دیکھنے کا موقع دیا جا رہا ہے۔
About The Author
