بارسلونا (ڈیلی دوست نیوز) تحریک انصاف اسپین کے چیئرمین سید ذوالقرنین شاہ کی جانب سے شاعرِ مشرق، مفکرِ پاکستان ڈاکٹر علامہ محمد اقبال کے 149ویں یومِ ولادت کے موقع پر بارسلونا کے خان نواب ریسٹورنٹ میں ایک پروقار تقریب کا انعقاد کیا گیا، جس میں تحریک انصاف اسپین کے عہدیداران اور دیگر شخصیات نے شرکت کی۔
تقریب میں ڈاکٹر ہما جمشید، پروفیسر طاہر عظیم، سید فریاد شاہ ،شہزاد اصغر بھٹی ،چوہدری ظہیر عاطف،ظہور احمد کمبوہ،ظفر اقبال اور تقریب کے آرگنائزر و تحریک انصاف اسپین کے چیئرمین سید ذوالقرنین شاہ نے شرکت کی اور علامہ محمد اقبال کی زندگی، شاعری، فکر اور فلسفے پر اظہارِ خیال کیا۔
مقررین نے اپنے خطاب میں کہا کہ علامہ اقبال محض ایک عظیم شاعر نہیں بلکہ ایک ایسے مفکر تھے جنہوں نے برصغیر کے مسلمانوں کو خودی، خود اعتمادی، آزادی اور بیداری کا پیغام دیا۔ ان کی شاعری نے مسلمانوں میں ایک نئی سوچ اور الگ قومی تشخص کا شعور پیدا کیا، جو آگے چل کر تحریکِ پاکستان کی فکری بنیاد بنا۔
اس موقع پر علامہ اقبال کے فلسفۂ خودی اور نوجوان نسل کے کردار پر بھی گفتگو کی گئی۔ مقررین نے کہا کہ اقبال نوجوانوں کو شاہین کی طرح بلند حوصلہ، خوددار، باعمل اور بلند پرواز دیکھنا چاہتے تھے۔ ان کے نزدیک نوجوان کسی بھی قوم کا سب سے قیمتی سرمایہ ہوتے ہیں اور قوموں کی ترقی کا انحصار نوجوانوں کی تعلیم، کردار، محنت اور مثبت سوچ پر ہوتا ہے۔
انہوں نے کہا کہ آج کے نوجوانوں کو علامہ اقبال کے پیغام کو صرف کتابوں اور تقریبات تک محدود رکھنے کے بجائے اپنی عملی زندگی کا حصہ بنانا چاہیے۔ خود اعتمادی، علم حاصل کرنے کا جذبہ، مشکلات کا مقابلہ کرنے کی صلاحیت اور اپنے مقصد سے وفاداری ہی اقبال کے پیغام کی حقیقی ترجمانی ہے۔
تقریب کے اختتام پر علامہ محمد اقبال کی 149ویں سالگرہ کی مناسبت سے کیک کاٹا گیا اور ان کی قومی، ادبی اور فکری خدمات کو خراجِ عقیدت پیش کیا گیا۔
