اسپین کے محکمہ ٹیکس نے 81 سالہ پنشنر کو گھر میں کئی دہائیوں سے محفوظ رکھے گئے 2 لاکھ یورو بینک میں جمع کرانے پر 101 ہزار یورو سے زائد ٹیکس ادا کرنے کا حکم دے دیا ہے۔ پنشنر بینکوں پر اعتماد نہیں کرتا تھا اور اس نے اپنی زندگی بھر کی بچت گھر میں گدے کے نیچے محفوظ رکھی ہوئی تھی۔
اخبار ایل پیریودیکو کے مطابق، اپریل 2017 میں اس شخص نے اپنی بیٹی کی جائیداد کی خریداری میں مدد کے لیے 200,480 یورو اپنے بینک اکاؤنٹ میں جمع کرائے۔ اتنی بڑی رقم جمع ہونے پر ہسپانوی ٹیکس ادارے نے تحقیقات شروع کر دیں۔
پنشنر کا مؤقف تھا کہ یہ رقم غیر قانونی ذرائع سے حاصل نہیں کی گئی بلکہ اس نے کئی برسوں کے دوران اپنی بچت گھر میں جمع کی تھی۔ اس نے ثبوت کے طور پر 2003 میں فروخت کی گئی زمین کی دستاویزات، 1997 کے سرمایہ کاری فنڈ، 2004 میں سیکیورٹیز کی فروخت اور اپنے اور والدین کے بینک اکاؤنٹس سے نکلوائی گئی رقوم کی تفصیلات بھی پیش کیں۔
تاہم ٹیکس حکام نے ان دستاویزات کو ناکافی قرار دیتے ہوئے کہا کہ یہ ثابت نہیں کیا جا سکا کہ پیش کردہ رقوم ہی 2017 میں بینک میں جمع کرائی گئی تھیں۔ چنانچہ اس رقم کو غیر واضح ذرائع سے حاصل ہونے والی آمدنی قرار دیتے ہوئے 101,102.53 یورو ٹیکس عائد کر دیا گیا۔
بعد ازاں ویلنشیا کے علاقائی اقتصادی و انتظامی ٹریبونل نے پنشنر پر اضافی 68,532.42 یورو جرمانہ عائد کرنے کی درخواست مسترد کر دی۔ عدالت کے مطابق یہ ثابت نہیں ہو سکا کہ پنشنر نے جان بوجھ کر کوئی قابلِ سزا خلاف ورزی کی تھی۔ یہ فیصلہ 24 ستمبر 2025 کو جاری ہونے والے مقدمہ نمبر 674/2025 میں سامنے آیا۔
اسپین میں گھر پر نقد رقم اور بچت رکھنا مکمل طور پر قانونی ہے، تاہم ضروری ہے کہ رقم کے اصل ذرائع، اس کے حصول کا وقت اور متعلقہ مالی دستاویزات محفوظ رکھی جائیں تاکہ ضرورت پڑنے پر ٹیکس حکام کو ان کی وضاحت دی جا سکے۔
