اسپین کی آبادی تیزی سے بڑھتے ہوئے 5 کروڑ کے تاریخی سنگ میل کے قریب پہنچ گئی ہے۔ قومی ادارہ شماریات (INE) کی جانب سے جاری کردہ تازہ اعداد و شمار کے مطابق یکم اکتوبر 2026 تک ملک میں مجموعی طور پر 49,935,642 افراد آباد تھے۔ گزشتہ تین ماہ کے دوران آبادی میں تقریباً ایک لاکھ 30 ہزار افراد کا اضافہ ہوا ہے۔ موجودہ رفتار برقرار رہی تو 2026 کے اختتام تک اسپین کی آبادی 5 کروڑ سے تجاوز کر سکتی ہے۔ اس تاریخی ہدف تک پہنچنے کے لیے اب صرف تقریباً 64 ہزار افراد کی کمی رہ گئی ہے۔
ادارہ شماریات کے مطابق اسپین کی آبادی میں یہ اضافہ ملکی تاریخ کی بلند ترین سطح ہے۔ گزشتہ ایک سال کے دوران آبادی میں 4 لاکھ 35 ہزار سے زائد افراد کا اضافہ ریکارڈ کیا گیا۔ اس اضافے کی بنیادی وجہ بیرون ملک سے آنے والے تارکین وطن ہیں، جن کا مجموعی آبادی میں اضافے کے تناسب میں حصہ 98.8 فیصد رہا۔
اعداد و شمار کے مطابق اسپین میں بیرون ملک پیدا ہونے والے افراد کی تعداد بھی بڑھ کر ایک کروڑ 43 ہزار سے تجاوز کر چکی ہے اور اب یہ تعداد ایک کروڑ 43 ہزار نہیں بلکہ 10,433,091 ہے۔ ان میں ایسے افراد بھی شامل ہیں جنہوں نے بعد میں ہسپانوی شہریت حاصل کر لی ہے۔
دوسری جانب غیر ملکی شہریت رکھنے والے افراد کی تعداد تقریباً 75 لاکھ تک پہنچ گئی ہے۔ گزشتہ تین ماہ میں ان کی تعداد میں 86 ہزار سے زیادہ کا اضافہ ہوا، جبکہ ہسپانوی شہریت رکھنے والوں کی تعداد بھی 43 ہزار سے زائد بڑھ کر 4 کروڑ 24 لاکھ ہو گئی۔
اس عرصے میں سب سے زیادہ تارکین وطن کولمبیا سے اسپین آئے، جن کی تعداد 33,200 رہی۔ اس کے بعد ہسپانوی شہریوں کی وطن واپسی کے 23,600 اور وینزویلا سے آنے والے 19,000 افراد کا نمبر رہا۔
آبادی میں اضافہ اسپین کے تمام خودمختار علاقوں اور شہروں میں ریکارڈ کیا گیا۔ سب سے زیادہ اضافہ ویلنشیا میں 0.48 فیصد، میڈرڈ میں 0.46 فیصد جبکہ میلیا اور لا ریوجا میں 0.36 فیصد رہا۔
اسپین میں گھروں کی تعداد بھی بڑھ کر تقریباً دو کروڑ کے قریب پہنچ گئی ہے۔ یکم اکتوبر تک ملک میں 19,953,529 گھرانے ریکارڈ کیے گئے۔ ان میں دو افراد پر مشتمل گھرانے سب سے زیادہ، تقریباً 58 لاکھ ہیں، جبکہ اکیلے رہنے والے افراد کے گھرانوں کی تعداد بھی بڑھ کر 57 لاکھ ہو چکی ہے۔
