اسپین کی دائیں بازو کی جماعت وکس (VOX) کے سربراہ سانتیاگو اباسکال نے تیسرے ممالک میں تارکینِ وطن کے لیے ملک بدری کے مراکز قائم کرنے کی حمایت کرتے ہوئے کہا ہے کہ اسپین میں غیر قانونی طور پر داخل ہونے والے افراد کو ایسے مراکز میں منتقل کیا جانا چاہیے۔ ان کا کہنا ہے کہ اس مقصد کے لیے قومی، یورپی اور بین الاقوامی قوانین میں بھی تبدیلیاں کرنا پڑ سکتی ہیں۔
اباسکال نے منگل کے روز جزائرِ کیناری کے علاقے لانزاروتے کے شہر اریسیفے میں انتخابی دورے کے دوران یہ بیان دیا۔ ان کا یہ مؤقف ایسے وقت میں سامنے آیا ہے جب جرمنی، نیدرلینڈز، ڈنمارک، یونان اور آسٹریا نے روانڈا میں یورپی یونین کا پہلا ’’ریٹرن سینٹر‘‘ قائم کرنے کے منصوبے کی منظوری دی ہے، جہاں یورپی ممالک سے ملک بدر کیے جانے والے تارکینِ وطن کو منتقل کیا جا سکے گا۔
اباسکال نے اس منصوبے کو درست سمت میں ایک قدم قرار دیتے ہوئے کہا کہ غیر قانونی طور پر داخل ہونے والے افراد کو ملک سے نکالنے میں مدد دینے والی تمام تجاویز کی ان کی جماعت مکمل حمایت کرے گی۔ ان کے مطابق تارکینِ وطن کی آمد کے مسئلے کا کوئی ایک حل نہیں، تاہم ملک بدری کے عمل کو فوری اور مؤثر بنانا ضروری ہے۔
انہوں نے کہا کہ اگر وکس اقتدار میں آتی ہے تو ملک بدری، وطن واپسی اور دوبارہ منتقلی کے عمل کو تیز کرنے کے لیے ضروری قوانین تبدیل کیے جائیں گے۔
دوسری جانب اس منصوبے کو بین الاقوامی قوانین اور پناہ گزینوں کے تحفظ سے متعلق ضوابط کے تحت قانونی مشکلات کا سامنا ہو سکتا ہے۔ 2024 میں اٹلی کی عدالت نے بنگلہ دیش اور مصر کے 12 شہریوں کو البانیہ منتقل کرنے کے حکومتی منصوبے کو روک دیا تھا۔
وکس کے انتخابی منشور میں غیر قانونی تارکینِ وطن کے علاوہ سنگین جرائم میں ملوث بعض قانونی تارکینِ وطن کی ملک بدری کی بھی حمایت کی گئی ہے۔ تاہم اباسکال کا کہنا ہے کہ ایسے فیصلوں سے پہلے ہر فرد کے معاملے کا انفرادی جائزہ لیا جائے گا۔
