اسپین کے قومی ادارۂ شماریات (INE) نے تصدیق کی ہے کہ ’قانونِ پوتے پوتیوں‘ (Ley de Nietos) کے تحت ہسپانوی شہریت حاصل کرنے والے 113,326 افراد آئندہ 29 نومبر کو ہونے والے عام انتخابات میں ووٹ ڈالنے کے حق سے محروم رہیں گے۔ یہ فیصلہ سپریم کورٹ کی جانب سے عائد کی گئی عبوری پابندی کے نتیجے میں سامنے آیا ہے۔
یورپی نیوز ایجنسی کے مطابق قومی ادارۂ شماریات نے سپریم کورٹ کے انتظامی امور سے متعلق چیمبر کو ایک تحریری رپورٹ پیش کی ہے، جس میں متاثرہ ووٹرز کی حتمی تعداد بتائی گئی ہے۔ اس رپورٹ کی نگرانی مرکزی الیکشن کمیشن (JEC) نے بھی کی ہے۔
رپورٹ کے مطابق وزارت خارجہ کی ابتدائی فہرست میں ایسے 163,355 افراد شامل تھے جنہوں نے جمہوری یادداشت کے قانون کے تحت ہسپانوی شہریت حاصل کی تھی۔ ان میں سے 901 افراد نے ثابت کیا کہ وہ جلاوطن افراد کی اولاد ہیں، لہٰذا انہیں ووٹ ڈالنے کی اجازت حاصل ہوگی۔
بعد ازاں نابالغ افراد، انتخابی فہرست بند ہونے کے بعد شہریت حاصل کرنے والوں اور جلاوطن خاندانوں سے تعلق ثابت کرنے والے افراد کو الگ کیا گیا۔ اس کے علاوہ دوہرے اندراج اور 2022 میں قانون کے نفاذ سے پہلے کے ریکارڈز کی بھی جانچ پڑتال کی گئی، جس کے بعد متاثرہ ووٹرز کی تعداد 113,326 مقرر کی گئی۔
تقریباً 36 ہزار افراد کے انتخابی ریکارڈ پر سوالات
دوسری جانب سیاسی جماعت ’’ایوستیتیا یوروپا‘‘ (Iustitia Europa) نے انتخابی فہرستوں میں تضادات کی نشاندہی کرتے ہوئے تقریباً 35,925 افراد کے ریکارڈ سے متعلق وضاحت طلب کی ہے۔
جماعت کے مطابق ابتدائی فہرست میں شامل 163,355 افراد کی تعداد کم ہو کر 153,648 رہ گئی، جبکہ قومی ادارۂ شماریات کو بیرون ملک مقیم ہسپانوی شہریوں کے انتخابی رجسٹر (CERA) میں صرف 117,723 افراد کا اندراج ملا۔
وکیل لوئیس ماریا پاردو کی قیادت میں جماعت نے مطالبہ کیا ہے کہ ہر متاثرہ شخص کی انتخابی حیثیت واضح کی جائے اور بتایا جائے کہ آیا ان میں سے کسی کا نام اسپین میں مقیم ووٹرز کے رجسٹر (CER) میں منتقل کیا گیا ہے۔
جماعت نے اعلان کیا ہے کہ وہ سپریم کورٹ سے مطالبہ کرے گی کہ قومی ادارۂ شماریات ان تمام ریکارڈز کی وضاحت کرے اور انتخابی فہرستوں سے ووٹ خارج کرنے کے طریقۂ کار کی تفصیلات فراہم کرے، تاکہ 29 نومبر کے انتخابات سے قبل عدالتی فیصلے پر عمل درآمد کی تصدیق ہوسکے۔
