اسپین میں 29 نومبر کو ہونے والے عام انتخابات سے قبل سیاسی رہنماؤں اور جماعتوں کے درمیان سوشل میڈیا پر مقبولیت کی دوڑ تیز ہو گئی ہے۔ تازہ اعداد و شمار کے مطابق اسپین کے وزیراعظم اور سوشلسٹ رہنما پیدرو سانچیز سب سے زیادہ فالوورز رکھنے والے سیاسی رہنما ہیں، جبکہ انتہائی دائیں بازو کی جماعت ووکس کے سربراہ سانتیاگو اباسکال دوسرے نمبر پر ہیں۔
انسٹاگرام، ٹک ٹاک اور ایکس (سابقہ ٹوئٹر) پر پیدرو سانچیز کے مجموعی فالوورز کی تعداد 67 لاکھ ہے، جبکہ سانتیاگو اباسکال 38 لاکھ فالوورز کے ساتھ دوسرے نمبر پر ہیں۔ ان کے بعد ریپبلکن لیفٹ پارٹی (ERC) کے رہنما گیبریل روفیان کے تقریباً 30 لاکھ اور پودیموس کی آئرین مونتیرو کے 26 لاکھ فالوورز ہیں۔
سیاسی جماعتوں میں ووکس تقریباً 30 لاکھ فالوورز کے ساتھ پہلے نمبر پر ہے، جبکہ پودیموس 22 لاکھ کے ساتھ دوسرے نمبر پر ہے۔ سوشلسٹ پارٹی 14 لاکھ 40 ہزار اور کنزرویٹو پاپولر پارٹی (PP) 12 لاکھ 10 ہزار فالوورز رکھتی ہیں۔
ماہرین کے مطابق سیاسی جماعتوں نے سوشل میڈیا کو اپنی انتخابی مہم کا بنیادی ذریعہ بنا لیا ہے اور ہر پلیٹ فارم کے مطابق خصوصی مواد تیار کرنے کے لیے وقت اور وسائل مختص کیے جا رہے ہیں۔
اوپن یونیورسٹی آف کاتالونیا (UOC) کی محقق ماریولا تارےگا کے مطابق یہ پہلے انتخابات ہیں جن میں امیدواروں نے سوشل میڈیا کے انداز اور زبان کے مطابق اپنی شخصیت اور پیغام کو کامیابی سے ڈھالا ہے۔
ماہرین کا کہنا ہے کہ اب بعض اوقات سوشل میڈیا پر جاری ہونے والا مواد روایتی میڈیا کی خبروں سے بھی زیادہ اہمیت اختیار کر جاتا ہے۔ سیاست دان براہِ راست عوام تک پہنچ سکتے ہیں اور صحافیوں کے سوالات کا سامنا کیے بغیر اپنے پیغام پر مکمل کنٹرول رکھتے ہیں۔
اعداد و شمار کے مطابق ووکس کے فالوورز کا 40 فیصد انسٹاگرام اور 37 فیصد ٹک ٹاک پر ہے، جبکہ پودیموس، پاپولر پارٹی اور سوشلسٹ پارٹی کے زیادہ تر فالوورز ایکس پر موجود ہیں۔
ماہرین کے مطابق انتخابی سیاست میں جماعتوں کے لوگو کے مقابلے میں سیاسی رہنماؤں کی ذاتی شخصیت اور روزمرہ زندگی کی جھلکیاں عوام کی زیادہ توجہ حاصل کر رہی ہیں۔
