ہسپانوی وزیراعظم پیدرو سانچیز اور بادشاہ فیلیپ ششم دنیا کے قد آور ترین رہنماؤں میں شامل

میڈرڈ(دوست مانیٹرنگ ڈیسک) اسپین کے وزیراعظم پیدرو سانچیز اور بادشاہ فیلیپ ششم کو دنیا کے سب سے قد آور عالمی رہنماؤں میں شامل کرتے ہوئے گنیز ورلڈ ریکارڈز 2026 میں جگہ دی گئی ہے۔

برطانیہ میں 26 اگست کو جاری ہونے والی نئی ایڈیشن کے مطابق، دنیا بھر کے 2,897 کارناموں میں سے 12 اسپانش شخصیات کے ریکارڈ بھی شامل کیے گئے ہیں۔ ان میں مختلف میدانوں کی نمایاں کامیابیاں درج ہیں، جیسے رافیل ندال کے 14 مرتبہ رولان گیروس جیتنے کا اعزاز اور آلویرو مارتین مندیئیتا کی تیز ترین جوتے کے تسمے باندھنے کی مہارت۔

تاہم سب سے زیادہ توجہ حاصل کرنے والے دو قومی ریکارڈ پیدرو سانچیز اور بادشاہ فیلیپ ششم سے متعلق ہیں۔ دونوں رہنما حال ہی میں 2024 کی تباہ کن بارشوں کی متاثرین کی یاد میں منعقدہ ریاستی تعزیتی تقریب میں ایک ساتھ شریک ہوئے تھے۔ گنیز بک کے مطابق پیدرو سانچیز کا قد 1.90 میٹر ہے جبکہ بادشاہ فیلیپ ششم 1.97 میٹر کے ساتھ دنیا کے سب سے قد آور بادشاہ قرار پائے ہیں۔

تاریخی لحاظ سے صرف دو سیاسی رہنما بادشاہ فیلیپ سے زیادہ قد آور رہے ہیں: وینوسٹیانو کارانزا، سابق صدرِ میکسیکو (1.98 میٹر)، اور بل ڈی بلازیو، سابق میئر نیویارک (1.98 میٹر)۔ دوسری جانب، سب سے کم قد والے رہنماؤں میں بینیتو خواریز (1.37 میٹر) اور فرانس کے سابق صدر نکولا سرکوزی (1.65 میٹر) کا ذکر کیا گیا ہے۔

گنیز بک کی اسی ایڈیشن میں ابائی یانوس کا بھی نام شامل ہے، جنہوں نے 13 جولائی 2024 کو “لا ویلادا دل آنیو 4” کی براہِ راست نشریات کے ذریعے Twitch پر 38 لاکھ سے زائد ناظرین کے ساتھ ایک نیا عالمی ریکارڈ قائم کیا۔

مزید برآں، معروف ٹی وی میزبان خیسوس واسکیز کو بھی شامل کیا گیا ہے، جو 1990 سے اب تک 46 مختلف پروگرامز پیش کر چکے ہیں، جن میں لا ووز، آیا تو، فیکٹر ایکس اور گران ہرمانو وی آئی پی جیسے مشہور شوز شامل ہیں۔