بارسلونا: 17ویں سالانہ “گران رکاپتے” مہم کا آغاز، عوام سے بھرپور تعاون کی اپیل

بارسلونا میں جمعے کی صبح “گران رکاپتے” (Gran Recapte) کی 17ویں سالانہ مہم کا آغاز ہوگیا، جو کہ بینک ڈیلز الیمنتس (Banco dels Aliments) کی جانب سے ہر سال منعقد ہونے والی ایک نمایاں فلاحی سرگرمی ہے۔ اس سال مہم معمول سے تین ہفتے قبل شروع کی گئی ہے، جس میں دس ہزار سے زائد رضاکار بارسلونا کے مختلف علاقوں میں عطیات جمع کرنے میں مصروف ہیں۔

یہ دو روزہ مہم ہفتے کی شام تک جاری رہے گی، جس کے دوران شہری اپنے عطیات کی صورت میں اشیائے خور و نوش کسی بھی مارکیٹ یا سپر مارکیٹ میں قائم دو ہزار مراکز پر جمع کرا سکیں گے۔ نقد عطیات دینے والے افراد 23 نومبر تک تنظیم کی ویب سائٹ کے ذریعے تعاون کر سکتے ہیں۔

بینک ڈیلز الیمنتس کی ڈائریکٹر الزبتھ ولادومیو مارنیت (Elisabeth Viladomiu Marnet) نے کہا کہ “گران رکاپتے عوام کا بنایا ہوا منصوبہ ہے۔ یہ وقت ہے اپنی اجتماعی ہمدردی کو ظاہر کرنے کا جو اس مہم کو ممکن بناتی ہے۔”

گزشتہ سال کی طرح اس بار بھی منتظمین کا ہدف چھ ملین یورو سے زیادہ مالیت کے عطیات اور خوراکی اشیاء اکٹھی کرنا ہے۔ یہ مہم ایسے وقت میں ہو رہی ہے جب تنظیم ہر ماہ تقریباً 2 لاکھ 30 ہزار ضرورت مند افراد کو خوراک فراہم کر رہی ہے۔

بینک ڈیلز الیمنتس کے مشیر رافائل ریبو (Rafael Ribó) نے کہا کہ “خوراک کی کمی غربت اور عدم مساوات سے جڑی ہوئی ہے، اور صحت مند غذائیت بنیادی انسانی ضرورت ہے۔”

رضاکاروں سے اپیل کی گئی ہے کہ وہ تازہ خوراک کے بجائے طویل عرصے تک محفوظ رہنے والی اشیاء جیسے دودھ، تیل، چاول، پاستا اور پکائے ہوئے دالیں عطیہ کریں۔ اس کے ساتھ بچوں کے لیے غذائی و نگہداشت کی اشیاء بھی خوش آمدید ہیں۔