اسپین کی آبادی کی نئی بلند ترین سطح: 4 کروڑ 94 لاکھ افراد تک پہنچ گئی،گھروں کی تعداد ؟

میڈرڈ (دوست مانیٹرنگ ڈیسک)اسپین کی آبادی میں رواں سال کی تیسری سہ ماہی کے دوران ایک لاکھ پانچ ہزار 488 افراد کا اضافہ ریکارڈ کیا گیا، جس کے بعد یکم اکتوبر 2025 تک ملک کی کل آبادی 4 کروڑ 94 لاکھ 42 ہزار 844 ہو گئی۔ یہ 1971 سے جاری سلسلہ وار اعداد و شمار میں سب سے زیادہ ہے۔

قومی ادارہ شماریات (INE) کے مطابق، آبادی میں یہ اضافہ بیرونِ ملک پیدا ہونے والے افراد کی آمد کی وجہ سے ہوا، کیونکہ اسپین میں پیدا ہونے والے شہریوں کی تعداد گزشتہ سہ ماہی کے مقابلے میں کم رہی۔ تازہ اعداد و شمار کے مطابق، مجموعی آبادی میں سے 3 کروڑ 96 لاکھ 17 ہزار 578 افراد اسپین میں پیدا ہوئے (گزشتہ سہ ماہی کے مقابلے میں 9 ہزار 901 کی کمی)، جبکہ 98 لاکھ 25 ہزار 266 وہ ہیں جو بیرون ملک پیدا ہو کر اسپین میں مقیم ہیں (جن کی تعداد میں ایک لاکھ 15 ہزار 389 کا اضافہ ہوا)۔

اعداد کے مطابق، اسپانش شہریت رکھنے والوں کی تعداد میں بھی 26 ہزار 551 کا اضافہ ہوا۔ مجموعی طور پر 4 کروڑ 23 لاکھ 10 ہزار 520 افراد کے پاس اسپانش شہریت ہے جبکہ 71 لاکھ 32 ہزار 324 غیر ملکی شہریت رکھتے ہیں۔ غیر ملکی شہریت رکھنے والے رہائشیوں کی تعداد میں 78 ہزار 937 کا اضافہ ریکارڈ کیا گیا۔

اسپین آنے والوں میں سب سے زیادہ تعداد کولمبیا کے شہریوں کی تھی (32 ہزار 100)، اس کے بعد اسپانش واپس آنے والے (24 ہزار 500)، مراکشی (23 ہزار 400) اور وینیزویلا کے شہری (20 ہزار 500) تھے۔ دوسری جانب، ملک چھوڑنے والوں میں سب سے زیادہ تعداد اسپانش (9 ہزار 100)، کولمبیائی (8 ہزار 200)، مراکشی (7 ہزار 900) اور رومانیائی (4 ہزار 400) شہریوں کی تھی۔

کاتالونیا میں آبادی میں نمایاں اضافہ

رپورٹ کے مطابق، 2025 کی تیسری سہ ماہی کے دوران تمام خودمختار کمیونٹیوں اور سیوتا و میلیہ میں آبادی میں اضافہ ہوا۔ سب سے زیادہ اضافہ کمیونٹی والنسیا (0.40٪)، آراگون (0.36٪)، کاستیا-لا مانچا (0.34٪)، کاتالونیا اور ناوارا (0.32٪)، آستوریاس اور لا ریوخا (0.30٪) میں ریکارڈ کیا گیا۔ قومی اوسط (0.21٪) سے اوپر اضافہ کرنے والی دیگر علاقوں میں کانتابریا (0.27٪)، میلیہ (0.24٪) اور کاستیا و لیون (0.23٪) شامل ہیں۔

دوسری جانب، اگرچہ اوسط سے کم لیکن آبادی میں اضافہ گلیسیا اور بیلئیرز (0.20٪)، مرسیا (0.19٪)، باسک خطہ (0.18٪)، کینری جزائر (0.16٪)، ایکستریما دورا (0.11٪)، میڈرڈ (0.09٪)، اندلس اور سیوتا (0.06٪) میں بھی ہوا۔

یکم اکتوبر 2025 تک اسپین میں گھروں کی تعداد 1 کروڑ 96 لاکھ 84 ہزار 380 تک پہنچ گئی، جو گزشتہ سہ ماہی کے مقابلے میں 55 ہزار 109 گھروں کا اضافہ ظاہر کرتی ہے۔