سپین میں برڈ فلو کے باعث تمام فری رینج پولٹری فارم بند کرنے کا حکم

بارسلونا (دوست نیوز)سپین کی وزارتِ زراعت، ماہی گیری اور خوراک نے برڈ فلو کے بڑھتے ہوئے کیسز کے پیشِ نظر تمام فری رینج پولٹری فارموں میں پرندوں کو بند رکھنے کا حکم جاری کر دیا ہے۔ یہ فیصلہ جمعرات کے روز اسپین کے سرکاری گزٹ میں ایک “احتیاطی اقدام” کے طور پر شائع کیا گیا۔

وزارت کے مطابق یہ بیماری “انتہائی متعدی” ہے، اور حالیہ ہفتوں میں اس کے کیسز میں نمایاں اضافہ ہوا ہے۔ نیا حکم نہ صرف تجارتی فارموں بلکہ ان گھروں پر بھی لاگو ہوگا جہاں ذاتی استعمال کے لیے مرغیاں یا دیگر پرندے رکھے جاتے ہیں، یا جہاں براہِ راست گوشت اور انڈے فروخت کیے جاتے ہیں۔

جولائی سے اب تک اسپین میں 14 مقامات پر برڈ فلو کے متاثرہ کیسز سامنے آ چکے ہیں، جن میں سے زیادہ تر کاستیا ای لیون میں رپورٹ ہوئے۔ اس کے علاوہ 53 جنگلی پرندے اور 5 قید میں رکھے گئے پرندے بھی متاثر پائے گئے ہیں۔ یورپ بھر میں مجموعی طور پر 139 کیسز ریکارڈ کیے گئے ہیں۔

وزارت نے بتایا کہ اگر کسی فارم میں پرندوں کو مکمل طور پر بند کرنا ممکن نہ ہو، تو مالک کو اجازت ہوگی کہ وہ ایسا محفوظ باڑہ یا ڈھانچہ قائم کرے جو جنگلی جانوروں یا بیرونی عناصر کو اندر آنے سے روکے۔

ماہرین کے مطابق خزاں کے موسم میں پرندوں کی ہجرت اور درجہ حرارت میں کمی کے باعث وائرس کے پھیلاؤ کے امکانات بڑھ جاتے ہیں۔

پیر سے قبل ہی وزارت نے اسپین کے 1,201 قصبوں میں، جو زیادہ خطرے والے علاقے سمجھے جاتے ہیں، پرندوں کی قید لازمی قرار دی تھی۔ بیان میں کہا گیا کہ اسپین کے مرطوب علاقوں میں بڑی تعداد میں پرندے ہجرت کرتے ہیں، اس لیے یہ اقدام اس خطرے کو کم کرنے کے لیے کیا گیا ہے کہ فارم کے پرندے متاثرہ جنگلی پرندوں سے رابطے میں نہ آئیں۔

کاتالونیا کی وزارتِ زراعت کے مطابق اب تک یہ پابندی صرف اُن علاقوں میں نافذ تھی جو ہجرتی پرندوں کے راستوں پر واقع ہیں، جیسے ایبری ڈیلٹا، ایمپوردا کے دلدلی علاقے، اور لییدا و تارراگونا کی مرطوب وادیاں۔ پہلے یہ پابندی 223 بلدیات تک محدود تھی، مگر اب اسے پورے کاتالونیا پر نافذ کر دیا گیا ہے۔

نئے حکومتی حکم نامے کے تحت بطخوں، ہنسوں اور دیگر پولٹری نسلوں کی افزائش پر بھی پابندی عائد کر دی گئی ہے۔ اس کے علاوہ جنگلی جانوروں کی دسترس میں آنے والے پانی کے ذرائع گھریلو پرندوں کو دینے پر بھی ممانعت ہے، الاّ یہ کہ پانی جراثیم کش عمل سے گزارا گیا ہو۔

کسی بھی قسم کی پرندوں کی نمائش، میلے یا ثقافتی تقاریب میں گھریلو یا قید پرندوں کو جمع کرنے پر بھی پابندی عائد کر دی گئی ہے۔

وزارت نے کہا کہ اگر مناسب حفاظتی اقدامات کیے جائیں تو بعض صورتوں میں کھلے ماحول میں پرندے رکھنے کی مشروط اجازت دی جا سکتی ہے، جس کے لیے مالکان کو اپنے ضلعی زرعی دفتر سے اجازت لینا ہوگی۔

زراعتی حکام نے خبردار کیا ہے کہ اس خطرناک صورتِ حال میں فارموں پر حیاتیاتی تحفظ (biosecurity) کے اقدامات کو سختی سے نافذ کرنا نہایت ضروری ہے۔ مالکان سے کہا گیا ہے کہ اگر اُن کے کسی پرندے میں غیر معمولی ہلاکت یا بیماری کی علامات ظاہر ہوں تو فوراً مقامی دفتر کو اطلاع دیں۔

مزید یہ کہ تمام غیر رجسٹرڈ گھریلو پرندوں کے مالکان سے کہا گیا ہے کہ وہ اپنے پرندوں کو رجسٹر کرائیں۔ ذاتی یا خاندانی استعمال کے لیے پرورش کیے جانے والے جھنڈ میں انڈے دینے والی مرغیوں کی تعداد 30 اور چوزوں کی تعداد 50 سے زیادہ نہیں ہونی چاہیے۔